G-NEWS (DILI) – Hafoin membru Organizasaun Arte Marsiais Persaudaraan Setia Hati Terate (PSHT) hala’o graduasaun ba nia membru sira iha Tibar, no halo provokasaun entre joven balun hosi arte ritual, sai ona diskusaun públiku, hafoin akontese kazu tuda malu iha área Rai-kotu, segunda-feira (14082023) dáder ne’e.
Asaun provokativu ne’e, halo komunidade balun nia uma hetan estragu, no balun konsege tuda hasoru autoridade seguransa sira ne’ebé fó seguransa ba serimónia graduasaun membru PSHT sira nian, no hamosu mós engrafamentu, halo sidadaun sira ne’ebé hala’o atividade iha dáder, iha área refere, balun tauk no trauma.
Autoridade seguransa hosi ekipa konjunta Falintil – Forsa Defeza Timor Leste (F-FDTL) no Polísia Nasional Timor Leste (PNTL) kontinua hala’o vizilansia tamas ai bairru, fatin sira ne’ebé identifika, deskonfia mosu krime.
G-News kontinua halo konfirmasaun ho sidadau sira iha kada bairro sira iha kapítal Dili, sira informa katak, aktus provokasaun ladun akontese tanba autoridade seguransa kontinua asegura no halo vizilansia, tama sai bairro hodi asegura seguransa hakmatek ba populasaun sira ne’ebé deskansa iha tenpu kalan.
“Iha ami nia bairro ka gang ne’e aman hela maun, la iha problema. Ohin tuku 9 ho balun ne’e mak Polísia sira tama mai iha ne’e, maibé sira halo patrullamentu de’it, no iha ne’e mós joven sira hakmatek iha ida-idak nia fatin hanesan bain-bain”, informa Santos Trindade, área Fatuhada nian, Segunda-Feira (14082023).
Iha parte seluk, Armindo Pinto, hela iha área Comoro, inform aba G-News katak, situasaun seguransa iha sira nia bairro hakmatek, maske joven balun halo barullu maibé la afeta ba perturbasaun ba ordem públiku.
“Iha ne’e, bain-bain ona, la iha problema, maske labarik sira toka múzika, mais ne’e la iha ligasaun ho problema sira ne’ebé akontese iha fatin seluk, tanba alin sira ne’e kalan-kalan sempre toka múzika”, haktuir Armindo.
Iha área Fumento, Comoro, rezidente ida Miguel informa mós ba G-News katak, iha sira nia bairro, la iha provokasaun maske iha informasaun katak iha joven balun halo provokasaun, relasiona ho kazu tuda malu ne’ebé akontese entre membru PSHT sira ho joven balun, iha segunda-feira dáder ne’e iha Rai-Kotu.
“Ami nia bairro hakmatek, la iha problema, keta iha bairro-seluk karik, iha ne’e aman loos”, haktuir nia, liuhosi telephone, segunda-feira (14082023).
Entertantu, Komandu Polísia Munisípiu Dili, liuhosi Seksaun Trânzitu hala’o passa-revista ba sasan kroat sira iha Motorizida no kareta privadu sira ne’ebé hala’o movimentu iha tempu kalan to’o dáder ba iha areadores Rotunda Comoro-Dili, ne’ebé apoiu mós hosi Unidade Espesial Polisia (UEP), BOP no COE.
Iha área merkadu Comoro nian, Unidade Espesial Polisia (UEP) hosi Ekipa Batalliaun Manutensaun Orden Públika (BMOP) COP C Delta, ne’ebé lidera hosi Primeiru Sargentu Polisia Blasius Colo ho ekipa hala’o seguransa Stand_By to’o dáder. Seguransa hanesan mós akontese iha Raikotu hosi Ekipa Batalliaun Manutensaun Orden Pulika (BMOP) COP C, inklui iha Tasi-tolu.
Jornalista : Ekipa G-News
Editór Testu : Amito Qonusere Araújo
loading="lazy" />