G-NEWS (DILI) — Bankada CNRT iha Parlamentu Nasionál, segunda-feira (09072024) deklara ninia polítika, hodi apresia IX Governu Konstitusionál, ne’ebé lidera hosi Primeiru-Ministru Kay Rala Xanana Gusmão, ne’ebé selebra tinan da-huluk mandatu, iha loron 01 fulan-Jullu tinan 2024.
Deklarasaun polítika bankada CNRT nian, ne’ebé haktuir liuhosi deputadu Saul Salvador Amaral haktuir katak, tinan dahuluk hodi aruma hikas indisiplina implementasaun PEDN 2030, impedimentu ba preparasaun kondisoens infraestruturas báziku no estratéjikas, nune’e mós desaliñamentu planeamentu hosi Governu Anterior ba boas prátikas sira husi dokumentu ODS (Objetivu Dezenvolvimentu Sustentável).
Períodu tinan-ida, Bankada CNRT rejista katak, Governu halo ona inisiativa no medidas lubun ida hodi estabelese hikas baze sira ne’ebé presiza atu promove dezenvolvimentu sosiál no ekonómiku hodi fó benefísiu ba timor-oan sira hotu.
“Ita hotu hatene, iha kompromisu CNRT nian maka korrije irregularidade sira ne’ebé komete husi Governu Anterior, afirma implementasaun reformas estruturais, aselera dezenvolvimentu infraestruturas, harii hikas konfiansa investimentu, harii hikas seguransa país nian, rezolve problema aihan karun hodi aposta futuru ida ne’ebé oportunu, prósperu no ekuitativu ba Timor-Leste”, intervensaun polítika hosi deputadu CNRT Saul Salvador Amaral, segunda-feira (09072024).
Tuir bankada CNRT nia haree katak, IX Governu aposta ona ba medidas adekuadu sira, Timor-Leste komesa sai ona husi korente inserteza polítika, ekonomia no sosial.
Problema barak mak governu sira husik iha tinan barak nia laran, agora komesa lori anin-foun ba timor-oan sira, komesa iha konfiansa investimentu, setor privadu moris hias no buras ba beibeik ne’ebé fó diresaun loos ba Timor-Leste nia futuru ida ne’ebé prósperu.
Deputadu CNRT Saul Salvador Amaral ko’alia liu-tán iha plenária Parlamentar kata, Timor Leste lao tuir ona ordem konstitusional no Planu Estratéjiku Dezenvolvimentu Nasionál (PEDN) ho prinsípius baze dezenvolvimentu ekonónomiku sustentável.
Atu termina, Bankada CNRT enkoraja membru governu sira hotu atu halo tuir de’it Leis no Programa IX Governu Konstitusionál, no husu atu selebra lalais auditória ida komprehensivu, no aprezenta rezultadu sira ba iha públiku.
“Ami mós husu atu CAC no Ministériu Públiku atu loke investigasaun ba autor hotu-hotu tuir Relatóriu Câmara de Contas ne’ebé involve iha krimi iregularidade no mal jestaun ba orsamentu estadu iha tinan hirak liu ba kotuk”, bankada CNRT hakotu nia intervensaun, liuhosi deputadu Saul Salvador Amaral.
Editór Testu : Amito Qonusere Araújo
loading="lazy" />