Boxista na’in-4 husu deskulpa ba povu TL tan falla partisipa ASEAN Games

G-NEWS (DILI) – Atleta timoroan ho modalidade Boxe ne’ebé reprejenta Timor Leste, atu partisipa iha eventu Internasionál ASEAN Games tinan 2023, ne’ebé realiza iha Hangzhou, Xina, labele kompete tanba ekipa organizadora la tuir enkontru teknikal.

Reprejentante Boxe Timor Leste Delio A Mouzinho, iha Hangzhou Xina, informa ba G-News Sábadu (23092023) semana ne’e hateten, atleta hosi modalidade Boxe la partisipa tanba ba tarde, no komosaun rasik la tuir enkontru technical meeting.

“Tanba ami mai tarde no treinador la tuir technical meeting. Kronologia entre komisaun mak la haree ba órario ne’ebé mak tuir teknikal meeting”, Delio haktuir.

Nu’udar atleta, tuir de’it orientasaun ne’ebé mak treinador sira fó. ho situasahn ne’e sira na’in-4 sente triste teb-tebes tanba sira konsidera mai ho misaun ne’ebé povu Timor fó fiar ba sira na’in-4.

“Maibé la iha lia-fuan”, hateten Delio Anzaqeci Mouzinho haktuir ba G-News, ho sentimentu triste.

“Ami sente triste no haree nasaun sira ne’ebé mak tuir boxing. Problema ne’e Timor ne’e nasaun ne’ebé la hanesan ho nasaun seluk. Ami nia preparasaun di’ak tebes no prontu atu saida de’it ami simu. Primeiru ami husu deskulpa tanba la’os ami mak lakohi joga maibé ita nia problema ne’ebé hosi ita nia komisaun”, Nia afirma tán. 

Nu’udar atleta husu ba Federasaun boxing Amadora Timor Leste nia intervensaun, atu servisu makas ho Komisaun Olimpiku Nasionál Timor Leste (CONTL_sigla portugés) tenke iha ligasaun ho International Boxing Association (IBA).

“Rekomendasaun ba federasaun tenke servisu makas no futuru oin mai lalika akontese tan
ami boxing na’in-4 iha futuru”, Delio haktuir.

Atleta ho modalidade Boxe ne’ebé sei la partisipa iha eventu Internasionál ne’e mak hanesan Delio Anzaqeci mouzinho, Alexandre Meliano da costa freitas, Elisio Gaio Raimundo no Edegar Foe Quintas.

Ekipa hirak ne’e sai hosi Timor iha loron 21, no to’o Hangzhou, Xina iha loron 23 fulan Setembru tinan 2023. Enkuantu technical meeting hosu komisaun eventu ASEAN Games hala’o iha loron 22 fulan setembru.

To’o informasaun ne’e fó sai, G-News seidauk halo konfirmasaun ho Presidente CONTL.

Jornalista     : Ekipa G-News
Editór Testu : Amito Qonusere Araújo