G-NEWS (DILI) – Prezidente Repúblika José Ramos Horta, apresia ho situasaun seguransa ne’ebé hakmatek iha loron ba festa Páskua nian, tanba la iha asaun kriminál ne’ebé akontese.
Lia-hirak ne’e, Xefe Estadu hato’o ba Primeiru-Ministru Kay Rala Xanana Gusmão, hafoin enkontru semanál, iha Palásiu Prezidénsial, Aitarak-laran, Dili, iha kuarta-feira (04042024).
Primeiru-Ministru Xanana Gusmão dehan, situasaun seguransa iha festa Páskua tinan ne’e la hanesan ho situasaun tinan hirak liuba, ne’ebé mosu tuda malu no baku malu.
“Enkontru semanál ho Prezidente. Prezidente apresia teb-tebes situasaun kalma agora, embora sei iha ne’e, iha ne’ebá mais la hanesan uluk ita rona tuda malu hela de’it, ema sona malu, baku malu iha ne’ebá”, PM Xanana Gusmão, inform aba Jornalista sira, iha Palásiu Prezidénsial, Aitarak-laran, Dili.
Xefe Gvernu ne’e afirma liu tán, Prezidente admira tebes ho prosesaun tinan ida ne’e, tanba ema hatudu ona katak, hosi komunidade, joven, no ferik-katuas sira iha ona konfiansa ba estabilidade.
“Imi hatene liu ami na’in rua Prezidente, imi sarani liu, ha’u haree domingu imi iha hela misa ne’ebá, mas Prezidente dehan, tinan kotuk ita ladun haree movimentu ne’ebé ema ba ho konfiansa. Ne’e mak ha’u dehan ba Prezidente, sarani sira, hakarak hatudu mós ba Prezidente katak, laos sira de’it mós Prezidente mak halo prosesaun ka via sakra sae to’o foho iha Oecuse”, PM Xanana.
“Mas nune’e mós, Prezidente mós apresia teb-tebes situasaun kalma ne’ebé ita bele hetan misa Páskua ninian to’o kalan boot, lao fila ba uma la iha problema. Ne’ebé Prezidente dehan sim señor kontente teb-tebes tanba buat hotu lao ho di’ak oituan”, Xefe Governu ne’e hakotu.
Editór Testu: Amito Qonusere Araújo
loading="lazy" />