G—News (DILI) – Conselho de Imprensa Timor-Leste (CITL) atribui tan karteira profisional ba jornalista na’in 12, iha salaun Conselho de Imprensa, Dili, Sesta-feira, 18 Setembru 2026.
Iha ninia diskursu, Prezidente Conselho de Imprensa Timor-Leste, António Maria da Conceição Moniz Mali, agradese ba fasilitadór sira ne’ebé durante ne’e fó formasaun ba jornalista sira, nune’e jornalista na’in 12 bele simu ona karteira profisional.
“Conselho de Imprensa agradese ba fasilitadór sira ne’ebé konsege durante ne’e fó formasaun ba ita-boot sira. Ohin ami konsidera ita-boot sira nu’udar jornalista profisional. Bainhira simu ona karteira profisional, ida-ne’e dignifika ita-boot sira nu’udar profisional, hanesan juíz, advogadu no deputadu sira,” haktuir António Maria da Conceição Moniz Mali.
Nia sublinha katak profesionalizmu signifika kesi-an ba knaar no responsabilidade. Iha área jornalizmu, nia hateten katak liberdade no responsabilidade sai hanesan prinsipiu importante, tanba jornalista hala’o knaar atu hato’o informasaun ba públiku.
Konstituisaun Timor-Leste garante liberdade espresaun no liberdade imprensa, ne’ebé permite media sira hala’o knaar jornalístiku ba interese públiku.
Maibé, nia hateten katak liberdade no responsabilidade tenki lao hamutuk. Jornalista no jornalizmu livre la’ós de’it liberdade atu hato’o informasaun, maibé tenki akompaña ho responsabilidade, ho konsiderasaun ba interese nasionál no interese públiku.
“Responsabilidade signifika livre, la’ós lao mesak de’it, maibé jornalista no jornalizmu livre tenki lao hamutuk ho responsabilidade, tanba iha interese nasionál no mós interese públiku hotu,” nia dehan.
Nia mós refere ba Deklarasaun Universal Direitus Humanus ONU, ne’ebé rekonhese liberdade espresaun hanesan direitu fundamental ne’ebé ema hotu-hotu tenki goza. Ba media, liberdade atu hato’o informasaun tenki lao hamutuk ho responsabilidade.
“Wainhira ita-boot sira simu karteira profisional ida-ne’e, senti orgullu no senti liberdade ne’e sei boot liu tan. Maibé, hau hakarak hateten liu tan, wainhira ita sente liberdade forte liu tan, responsabilidade mós tenki boot liu tan. Tenki hanoin sociedade no interese nasionál, no labele publika buat ne’ebé prejudika públiku no la kontribui ba nasaun,” nia sublinha.
Nia hateten mós katak media konsidera hanesan pilar dahaat iha nasaun ida, tanba ne’e importante atu kuidadu no proteje dignidade profisaun jornalizmu, respeita étika jornalista, no kontinua hadi’a kapasidade no koñesimentu.
Enkuantu representante jornalista sira, Martinho Belo, hateten katak nia sente orgullu ba Conselho de Imprensa no fasilitadór sira ne’ebé fó formasaun no rekonesimentu ba profissionalizmu jornalista sira iha área jornalístika.
“Hau sente orgullu ba Conselho de Imprensa no fasilitadór formasaun sira ne’ebé durante ne’e fó formasaun no rekonesimentu ona ba hau nia profesionalizmu iha área jornalístika, hodi hato’o informasaun ba públiku,” hateten Martinho Belo.
Jornalista na’in 12 ne’ebé simu karteira profisional ne’e mai hosi órgaun komunikasaun sosiál Media One Timor, Gardamor-News, Loluwary, SAP News, Labeh, Timor Post, GMN, Rafa no Independent.
Tuir dadus ne’ebé hato’o iha atividade ne’e, hosi tinan 2017 to’o 2026, Conselho de Imprensa atribui ona karteira profisional, diretamente no liuhosi prosesu hamutuk, ba jornalista na’in 471.
Enkuantu jornalista sira ne’ebé Conselho de Imprensa fó ezame no atribui karteira profisional hamutuk 136.
Atividade atribuisaun karteira profisional ne’e marka tan etapa ida ba jornalista sira iha Timor-Leste atu hala’o knaar jornalístiku ho responsabilidade, no tuir prinsipiu profesionalizmu no étika jornalístika.
loading="lazy" />