G-NEWS (DILI) – Relasiona ho desizaun Tribunál Judisiál Primeira Instânsia Dili, ne’ebé deside pena efetivu tinan lima ba arguido antigu Ministru Komérsiu no Industria, atuál Embaixador Timor Leste ba Repúblika Indonézia António da Conceição, seidauk iha desizaun final bainhira iha rekursu.
Ba G-News, tersa-feira (09012024), Eis Adjuntu Komisáriu CAC ba asuntu Prevensaun no Sensibilizasaun Luis de Oliveira Sampaio esplika, kazu ne’e seidauk tama kategória desizaun trânzitu-julgadu.
“Iha prinsípiu hosi perspetiva regra prosesual nian, kazu ne’e seidauk finál ka seidauk tama kategória desizaun trânzitu-julgadu (putusan berkekuatan hukum tetap) tanba iha posibilidade boot kazu hanesan ne’e advogadu sira sei halo rekursu. Tanba ne’e ita la bele konklui katak kazu ne’e loos ona ka final ona”, Luis esplika.
Nia esplika tán, kazu ho natureza korrupsaun laos ho prosesu lalais.
“Ita nia esperiensia prosesu rekursu sira iha kazu ho natureza korrupsaun ne’e mos laos prosesu lalais – han tempu tinan barak, bele tinan tolu, tinan haat ka tinan lima ba leten hanesan kazu ne’ebé akontese ba kotuk. Tribunal sira sei dudu ba dudu mai tanba kestaun oi–oin”.
“Enkuantu nomeiasaun ba kargu embaixador, ne’e halo ka anúnsia no fó pose antes tribunál Primeira Instânsia anunsia ninia desizaun. Tuir loos – prátika di’ak sira balun Prezidente Repúblika antes nomeia nia, presiza konsulta ho autoridade judisiariu sira se kandidatu sira ne’e keta iha hela prosesu ka hatan hela ba prosesu ruma karik, bainhira Prezidente Repúblika halo ida ne’e, sei evita konfuzaun ka dilema sira hanesan ne’e akontese satan figura ne’e atu ba reprezenta estadu iha nasaun seluk”, Eis Diretór JSMP ne’e klarifika.
Bainhira advogadu sira deside atu halo rekursu signifika kazu ne’e seidauk final, nune’e Luis de Oliveira Sampaio klarifika, bainhira Tribunál Rekursu nia desizaun no sei la iha ona rekursu foin mak bele konsidera desizasaun ne’e final, tanba ne’e la iha dalan tuir lei atu Polísia kaptura arguidu ka kondenadu, Polisia so bele kaptura bainhira simu ordem hosi Tribunal.
“Bainhira nia hahú rekursu signifika kazu ne’e hahú “matak” fali ka iha bahasa dehan “kasus mentah kembali”, signifika kazu ne’e sei hahú foun fali tanba ne’e arguidu kontinua livre to’o tribunal rekursu konfirma desizaun tribunal primeiru instânsia ka halo desizaun seluk”, Luis hakotu.
Jornalista : Ekipa G-News
Editór Testu : Amito Qonusere Araújo
loading="lazy" />