G-NEWS (DILI) — Iha Proklamasaun proklamasaun Independénsia ba dala 49, povu Timor Leste, husi parte oioin halo reflesaun kona-ba jornada nasaun nian. Mezmu iha ona progresu balu, ema barak sei sente nafatin impaktu hosi falta asesu ba servisu báziku sira hanesan saúde, edukasaun no infraestrutura.
Maski iha dezafiu, maibé sira optimista nafatin no hein katak governu sei kontinua responde ba sira nia nesesidade.
Armindo Monis husi Baucau hato’o nia preokupasaun kona-ba kualidade servisu saúde iha nia área. “Iha Baucau, ita haree mudansa oioin, liuliu kona-ba infraestrutura hanesan estrada. Maibé ita-nia ospitál sira limitadu tebes no dala barak laiha ekipamentu médiku. “Rezidente barak mak obriga atu ba Dili hodi hetan tratamentu ne’ebé di’ak liu,” nia dehan.
Maski nune’e, Armindo optimista nafatin, “Ha’u fiar governu sei rona ita-nia nesesidade no hadi’a fasilidade saúde iha ne’e.”
Aliña ho Armindo, Maria Antoneta de Jesus husi Aileu mós hato’o nia preokupasaun kona-ba servisu saúde no edukasaun iha nia área.
“Sentru saude komunitariu dala barak falta aimoruk, no ami nia oan sira nafatin susar atu hetan edukasaun ne’ebe lolos tanba eskola ne’ebe iha limitadu tebes,” nia hateten. Maibé, nia la lakon esperansa. “Ha’u iha serteza katak ho serbisu maka’as hosi governu, liuliu iha Proklamasaun independénsia ida-ne’e, sira sei fó atensaun liután ba ita nia rejiaun izoladu”, nia hatutan.
Iha Suai, Januario Barreto nota katak maski iha progresu iha konstrusaun estrada, problema barak maka sei la rezolve.
“Infraestrutura hanesan estrada sei aat hela, liu-liu iha area remotas. “Ita mós hasoru problema iha setór saúde, tanba fasilidade ne’ebé iha la adekuadu,” nia dehan. Maibé, Januario fiar katak mudansa sei mai. “Governu definitivamente hatene kona-ba problema ida-ne’e, no ha’u iha serteza katak sira sei foka ba hadi’a situasaun ida-ne’e.”
Juanico Elo mós sente kondisaun hanesan iha RAEOA (Rejiaun Administrativa Espesiál Oecusse-Ambeno). “Iha RAEOA, ami-nia problema boot liu maka infraestrutura ne’ebé estraga. “Estrada sira ne’ebé liga ita-nia suku sira aat tebes, tanba ne’e ita iha difikuldade atu hetan asesu ba servisu saúde no edukasaun ne’ebé di’ak,” dehan Juanico. Maski nune’e, nia nafatin iha konfiansa maka’as katak governu sei responde ho asaun loloos. “Espera katak Proklamasaun Independénsia ba dala 49 ida-ne’e sei sai momentum ida ba mudansa ba di’ak liután.”
João Gomes nu’udar estudante husi Universidade Nasionál Timor Lorosa’e (UNTL), mós hato’o nia hanoin kona-ba setór edukasaun.
“Nu’udar estudante, ha’u esperiénsia rasik oinsá fasilidade edukasionál sira limitadu iha nasaun ida-ne’e. Eskola barak laiha profesór no fasilidade aprendizajen. “Ida ne’e hanesan obstákulu ida ba ita-nia futuru”, dehan nia.
Iha parte seluk, nia haree esforsu oioin governu nian ne’ebé hahú hadi’a situasaun. “Ha’u iha serteza katak governu tenta hela, no ami hein katak iha futuru sei iha melloria sira ne’ebé signifikativu liu.”
Joven ida husi Ermera, Rosario Gomes, ko’alia kona-ba asuntu saúde no edukasaun iha nia rejiaun. “Ita nia sentru saude sira dalabarak laiha aimoruk, no labarik barak mak labele ba eskola tanba distansia dook no fasilidade ne’ebe minimu,” dehan Rosario. Maske nune’e, nia fiar katak governu sei la nonok. “Iha espíritu selebra independénsia, ha’u iha serteza katak governu sei fó atensaun liu ba ita-nia área sira ne’ebé sei subdezenvolvidu.”
Mariano Menezes husi Manufahi mós hato’o nia preokupasaun kona-ba kondisaun fasilidade saúde no edukasaun iha nia área.
“Ita sei falta tebes iha setór saúde. Ita-nia ospitál sira dalabarak laiha ai-moruk no ekipamentu médiku sira. “Nune’e mos ho edukasaun, labarik barak labele kontinua sira nia estudu tanba distansia ne’ebe dook no falta fasilidade,” dehan Mariano.
Maibé, nia espresa ninia esperansa. “Ha’u iha serteza katak governu sei foka liu ba dezenvolve área sira ne’ebé sei subdezenvolvidu, hanesan Manufahi.” Ami hakarak esperiénsia progresu hanesan ho munisípiu sira seluk.”
Iha Baucau, Cesario Ximenes hato’o esperansa ne’ebé hanesan. “Ami iha Baucau sente katak iha ona melloramentu balun, liu-liu kona-ba estrada sira. Maibé, iha setór saúde no edukasaun, ita sei dook hosi espetativa. “Ospital barak mak laiha ekipamentus mediku ne’ebe adekuadu, no eskola sira iha ne’e mos falta profesores,” esplika Cesario. Maibé, nia nafatin sente optimista. “Ha’u fiar katak governu sei serbisu maka’as atu hadi’a falta sira-ne’e no garante katak dezenvolvimentu sai ekuitativu ba sikun hotu-hotu iha nasaun ne’e.”
Vizaun Fahe: Dezenvolvimentu Ekuitativu ba Ema Hotu
Mesmu dezafiu oi-oin sei hasoru hela, buat ida espresa husi kuaze intervista hotu: esperansa ba governu ne’ebé sei kontinua tau atensaun no responde ba nesesidade báziku sosiedade nian. territótiu Timor laran tomak, povu tomak hakarak mudansa loloos, liu-liu iha setór saúde, edukasaun no infraestrutura.
Komemorasaun aniversariu proklamasaun independensia ba dala 49 hanesan momentu reflesaun ida ba povu Timor Leste tomak, katak maske jornada dezenvolvimentu sei naruk hela, ho governu nia servisu makas no atensaun, sira optimista katak futuru di’ak sei iha tempu badak bele atinji. Susesu la’ós de’it sukat hosi infraestrutura ne’ebé harii, maibé mós hosi aumentu kualidade moris ba sidadaun ida-idak, lahó exesaun.
Hanesan Januario Barreto husi Suai hateten, “Hau fiar governu sei servisu nafatin hodi hadia buat sira ne’e hotu. Ita hein kleur ona, no agora tempu ba mudansa to’o ona. “Espera katak tinan 49 ukun an ne’e sei lori Timor Leste ba futuru ne’ebe di’ak ba nia povu tomak.”
Editor Testu: Amito Qonusere Araújo
loading="lazy" />