G-NEWS (DILI) – Relasiona ho informasaun sira ne’ebé viral iha mídia nasionál no sosial mídia, hafoin Diretór Ezekutivu Polísia Científika Investigasaun Criminal (PCIC) fó pistola ba nia oan hodi utiliza ba treinu.
Nune’e, estudante akadémiku no joven sidadaun sira kondena makaas aktus ne’e, tanba aktu ne’e konsidera nu’udar prátika ba abuzu poder hosi Diretór Ezekutivu PCIC.
Estudante UNTL Arlindo Joquim Maia, ba G-News, kinta-feira (19102023) informa, aktus ne’ebé envolve hosi diretór Ezekutivu hodi fó pistol aba nia oan hodi treinu nu’udar prátika abuzu poder.
“Konforme informasaun sira ne’ebé mídia sira fó sai, kuandu informasaun ne’e loos, ne’e Diretór Ezekutivu PCIC ne’e halo buat laloos. Ne’e nia prátika abuzu poder, ne’e la merese atu akontese, tanba ne’e arma Estadu nian, arma Povu nian, nasaun ne’e labele tolera atu ezekutivu sira uza arma estadu treinu ka uza ba sira nia nesesidade, ne’e krime”, haktuir nia.
“Ita husu ba PDHJ, CAC, no PNTL atu halo investigasaun imediata, hodi bele hatene ninia kronolojia, tanba kuandu autoridade Estadu ne’e mak husik loos de’it, ninia konsekuênsia afeta ba sidadaun hotu-hotu iha futuru, uza sira nia poder hodi halo buat ruma la tuir dalan legál”, Arlindo lamenta kona-ba ne’e.
Iha parte seluk, estudante Universitáriu IOB Lucas Soares esklarese, aktus ne’ebé diretór PCIC komete hanesan prátika abuzu poder, no fö prezuizu ba Estadu.
“Pistola ne’e arma Estadu nian, ne’e arma Povu nian, ne’e fó prezuizu ba Estadu. Aktus ne’e abuzu poder. Tuir loloos Ministériu Justisa tenke halo ona investigasaun hodi buka hatene ninia rajaun, kuandu husik bebeik, ema barak sei halo tuir, tanba konsidera buat ne’e hanesan bain-bain, tanba Governu la iha intervensaun, entaun ema hotu bele treinu, aban-bainrua buat at ne’ebé ita la espera bele akontese”, haktuir nia.
Antes ne’e, Jerasaun Patriota mós kondena makaas aktus refere.
To’o informasaun ne’e fó sai, G-News seidauk hetan resposta hosi Diretór Ezekutivu PCIC kona-ba ne’e.
Jornalista : Ekipa G-News
Editór Testu : Amito Qonusere Araújo
loading="lazy" />