G-NEWS (DILI) – Bispu Diocese Baucau Dom Leandro Maria Alves, iha Selebrasaun Eukaristia loron São João Maria Vianey, iha semináriu Maloa, Dili foin lalais ne’e hateten, ho mudansa teknolójia, sarani sira, liu-liu sira ne’ebé asesu informasaun iha sosial mídia ho telemóvel, la iha komunikasaun direita ho ema ne’ebé besik ka viziñu.
“Agora ne’e ita haree telefone ne’e, ita besik malu hela, maibé dalaruma mós halo ita la sai hanesan maun ho alin. Ita sira besik-besik malu ne’e mak dook malu fali, duke ita ho fali ema sira seluk”, Bispu Diocese Baucau Dom Leandro esplika kona-ba ne’e.
“Dalabarak apa ho ama sira tur iha meja, han, sibuk hela telefone, haluhan tiha atu ko’alia, husu oan sira, di’ak ka la di’ak, imi nia hahalok ohin loron ne’e hanusa, oinsa imi nia vida ba ohin loron ne’e oinsa”, Dom Leandro haktuir tán.
Bispu Dom Leandro dehan tán, dalabarak ema ne’ebé kaer telemóvel preokupa liu ema ne’ebé dook.
“Dalabarak mak ita hanoin, ou ita haluhan tiha, preokupa liu buat ne’ebé dook hosi ita duke ida ne’ebé besik teb-tebes hosi ita nia sorin”,
“Ita besik malu hela, mais ita lakon sentidu maun alin ninian”.
Dom Leandro Maria Alves dehan tán, tinan ida ne’e atu bolu atensaun ba ema hotu-hotu atu moris lao hamutuk.
“Tinan ida ne’e, ita rona, tinan ida ne’ebé ko’alia, bolu atensaun mai ita, oinsa ita moris lao hamutuk ne’e, sinodalidade, ita buka atu lao hamutuk’.
“Lao hamutuk ida oinsa, ida ne’e mak presiza teb-tebes ita atu husu, dalaruma ita bele moris hamutuk hela iha uma ida, maibé ita bele dook malu teb-tebes, tán ne’e mak Amu Papa husu ita buka atu lao hamutuk, lao hamutuk ne’e nia abut mak orasaun, buka atu metin ho orasaun, orasaun ne’e mak sai hanesan fundamentu ba ita nia hahalok lao hamutuk ninian”, Dom Leandro hakotu nia ómilia, iha selebrasaun eukaristia loron São João Maria Vianey, iha semináriu Maloa, Dili foin lalais ne’e.
Editor Testu : Amito Qonusere Araújo
loading="lazy" />