G-NEWS (DILI) – Segunda-Feira (27112023), Ekipa G-News hakbesik-án ba timoroan sira ne’ebé hala’o atividade negósiu (Negosiante ambulante) iha Largo de Lecidere. Bainhira to’o iha ne’ebá, sidadaun ida hosi munisípiu Laga Celestino Soares hamnasa hasoru vizitante sira ne’ebé atu ba sosa akua ka sigaru ruma.
Ninia hamnasa ne’e atrai vizitante sira. Mane ho tinan 33 ne’e loron-loron sempre hala’o ninia atividade negósiu la kolen.
Bainhira ekipa G-News husu nia kondisaun, mane ho morena oan ne’e komprimenta ho hamnasa, no simu ho ksolok ekipa G-News, no hatudu fatin atu tur, nune’e bele sosa netik sigaru ka kafé ruma, no ekipa G-News husu atu halo entrevista, maibé ho hamnasa, Celestino hatan dehan katak, ho entrevista ne’e kolega sira sei goja nia, mai é ho kalma, Jornalista G-News esplika, ikus mai, Celestino aseita atu halo entrevista.
Jornalista G-News husu perguntas da-huluk, kona-ba rendimentu kada loron, Celestino hatan ho hamnasa, maibé resposta sira ne’e hatan ho loos.
“Loron ida dollar 30, maibé depende ba ema sosa. Dalaruma to’o dollar 40”, Celestino esplika.
Celestino dehan tán, sasan sira ne’ebé nia faan, sira sosa tutan iha loja, no haktuir tán katak, kuandu sasan presu sae, sasan ne’ebé nia faan manan kuarter de’it, maibé agora lumayan oi’tuan.
“Iha ne’e loke dáder to’o kalan. Kolega mídia sira mak barak mai sosa iha ne’e. Dalaruma sira tur iha ne’e to’o kalan tuku-10 mai fila, inklui kolega estudante universiráriu sira ne’ebé halo ezersisiu eskola nian”, nia esplika.
“Sasan sira ne’ebé faan mak sigaru, pulsa, supermie, kafé no sasan ki’ik seluk tán”,
Ekipa G-News konfuzaun oi’tuan kona-ba seguransa ba sasan sira ne’e, maibé ho laran kaman, Celestino ko’alia nakloke.
” Kuandu kalan ami fila ba uma, uza terpal kesi metin, pois dádersan mak mai loke fila-fali. Ha’u ho ferikoan mak troka malu hein”.
Nia dehan tán, vizitante sira ne’ebé maiória mai sosa sasan hirak ne’e, barak liu maohosi Jornalista no estudante universitáriu sira.
“Ho kolega Jornalista sira, ami toman malu hanesan maun-alin. Sira mai sosa kafé, ami goja malu, no konhese malu di’ak liu-tán”, Celestino hakotu nia lia-fuan ba G-News, no nia kontinua atende vizitante seluk ne’ebé sosa sasan.
Antes ne’e, hosi tinan 2022, Celestino Soares, hela iha Australia, hanesan traballador durante fulan-9. Depois fila hosi ne’ebá, nia hahú loke negósiu iha Largo de Lecidere to’o agora.
Jornalista : Ekipa G-News
Editór Testu : Amito Qonusere Araújo
loading="lazy" />