G-NEWS (DILI) – Apolinário da Cruz Casteliano, tinan 16, hosi Aldeia Taubere, suku Samalari, postu Baguia munisípiu Baucau, loron-loron hala’o atividade faan nuu iha Pantai-Kelapa Dili. Nia moris iha Samalari, iha loron 31 fulan Marsu tinan 2007.
Dadauk ne’e, Apolinário, nu’udar estudante terseiru ano iha Eskola EBF João Bosco Samalari, Baguai, no sura de’it semana atu rona ona rejultadu ezame Nasionál no lokál, katak rejultadu ho prova passa, Apolinário bele kontinua nia estudu iha eskola sekundária númeru 1 Baucau.
“Planu ha’u atu kontinua eskola iha SMA 1 Baucau”, Nia haktuir ba G-News, segunda-Feira, 20112023.
Nia dehan ba G-News katak, atividade faan nuu ne’ebé nia hala’o iha kapitál Dili tanba eskola férias ona.
“Agora Ha’u mai faan nuu ajuda maun. Kuandu eskola fali la faan ona, no fila fali ba foho hodi kontinua eskola”, Apolinário haktuir ho kontente.
Nuu ne’ebé nia faan, loron ida hetan dollar 80 to’o dollar 100.
“Nuu ne’e sosa hosi Lospalos mak mai faan iha Dili. Sosa nuu fuan ida ho folin centavu 10”, nia tenik.
Osan ne’ebé Apolinário hetan hosi atividade faan nuu, sei ajuda fila-fali nesesidade família nian.
“Sosa roupa, rinso, sabaun sira, selu ema nia kos”, hateten Apolinário.
Tuir observasaun G-News, sidadaun barak mak sempre sosa nuu iha área Pantai-Kelapa iha dáder, meúdia no lorokraik, ho folin dollar ida hosi nuu fuan ida.
Apolinário da Cruz Casteliano, ho maun-alin na’in hat. Nia nu’udar oan ikun hosi Duarte Casteliano no Adriana Maria da Cruz, servisu nu’udar agrikultor iha Baguai.
Entertantu, iha Segunda-Feira, loron 20 fulan Novembru, sai nu’udar loron mundial ba Labarik nian, iha ne’ebé Timor Leste mós selebra loron ida ne’e, hodi fó rekoñesimentu ba labarik sira nia direitu iha família no nasaun laran.
Jornalista : Ekipa G-News
Editór Testu : Amito Qonusere Araújo
loading="lazy" />