G—NEWS (DILI) — Estudante sira hosi EBF 9 de Setembro Tumin Oe-Silo RAEOA, hala’o enkontru extraordináriu ho Prezidente Republika José Ramos-Horta iha Palásiu Presidensial Kuarta Feira foin lalais ne’e (11/12/2025).
Iha oportunidade ne’e, hanesan esperiensia dahuluk ba sira wanhira tama iha palásiu laran ho sentimentu emosionadu no esperansa. Antes ne’e, estudante sira hetan konvite ofisiál hosi Prezidente Repúblika ne’ebé konvida direta sira ne’ebé hela liu iha área rurál iha Oe-Silo besik fronteira entre Timor-Leste no Indonézia hodi rona direta sira nia defikuldade iha prosesu Aprendisajen.
Iha salaun “Nicolau Lobato”, enkontru ida ho tempu liu oras ida, sala ne’e nakonu ho emosionadu tebes bainhira estudante ida naran Berta Sufa, ho matan-been, hato’o sira nia prekupasaun kona-ba prosesu aprendisajen no situasaun moris difisil ne’ebe sira enfrenta. Nia haktuir kona-ba kondisaun inan-aman ne’ebé servisu barak iha to’os, sira nia distânsia hela fatin do’ok quaze lao kilómetru 6 to’o sira nia eskola fatin no falta fasilidade eskola nian.
“Ami presija avo (Prezidente) nia tulun atu harii Eskola ida mai ami lai…!” Liafuan estudante Berta ne’e mak, halo ema hotu iha sala laran nonok ho hakmatek.
“Ami mai iha ne’e Presija avo (Prezidenete) nia tulun tanba iha ami nia Eskola ne’e ….. (nia nonok kleur triste ho matan be’en)…, exelensia Prezidente ami sei lalakon atu estuda nafatin, tanba ha’u nia inan-aman sira mos servisu iha to’os maibé sira hakarak ha’u tenke eskola”. hateten estudante Sufa ho tanis.
Professor Renato Unamet, voluntáriu ida iha eskola refere, iha nia entrevista ho jornalista Destakadu Prezidensia nian, hato’o mós nia sentidu profundu kona-ba primeira vez estudante rurál sira, simu oportunidade konvite extraordináriu ne’e hodi enkontru ho Xefe Estadu.
Nia explika kondisaun limitadu, no sei esforsu atu servisu hamutuk ho Prezidénsia hodi buka solusaun ba Eskola refere.
“Ami hetan Konvite diretamente hosi nai Prezidente Repúblika. Ohin hosi ami nia estudante sira hato’o buat ne’ebé maka ami sente iha area rural ne’eba, fasilidade sira ne’ebe ami sente la konfortavel, infraestutura no problema barak ne’ebe ami nia estudante sira hasoru iha area rural no ami hato’o ba prezidente atu koko servisu hamutuk liu-liu ba parte relevante sira hodi hatan ba nesesidade sira”.
Prezidente Republika Jose Ramos-Horta hatan ba preokupasaun no fó kompromisu katak: Prezidénsia sei hadia eskola refere, halo asrama, haree kondisaun haris-fatin no fó apoiu transporte ba estudante sira ne’ebé hela do’ok no sei fasilita estudante balun ne’ebé hakarak hela iha Asrama DIli. Kolabora ho Profesor sira atu halo transferensia ba estudante atu labele lakon prosesu aprendisajen no Prezidénsia prontu atu fó mos apoiu mensal ba sira.
Prezidente subliña katak problema hanesan ne’e la’ós deit iha Oe-Cusse, maibé iha nasionál tomak no Prezidénsia kontínua hadia Eskola sira iha area rural, konstrui uma ba komunidade vulnerável sira ne’ebé kondisaun defisil tebes.
loading="lazy" />