G-NEWS (MANUFAHI) – Moris iha mundu, nakonu ho dramátika oi-oi. Hosi drámatika hirak ne’e, balun sai riku no balun mós ki’ak. Hosi nível riku, tenke kontente, maibé nível ki’ak tenke pasiensia hodi simu realidade. Maibé buat ida ne’ebé terus liu hosi terus hotu-hotu mak kondisaun psikolójiku kuandu la estável. Ó bele riku, maibé kondisaun psikolójiku la estável, hanesan hela loos iha uma boot ida ho nakonu ho AC (air conditioner) maibé loron matan kona tán la uza kalen, satan moris bain-bain, nakonu ho família barak, mak membru família ida ulun boot família ida nian enfrenta kondisaun nune’e, bele imajina hanesan rai ne’ebé luan sai kloot tiha, bee ne’ebé midar sai siin tiha.
Situasaun ida ne’e mak akontese ba Inan-Faluk ida, Luciana da Conceição iha munisípiu Manufahi. Tuir informasaun ne’ebé G-News rekolla katak, Luciana da Conceição la iha kbi’it atu sustenta nia oan na’in-7, hosi oan feto na’in-3 no mane na’in-4, iha aldeia Weberek, suku Dotik postu Alas munisípiu Manufahi tanba sofre moras mental.
Familia hosi Inan-Faluk Domingos da Costa (Costa Bahatada) informa ba G-News kuarta-feira (11102023) katak, Inan-Faluk Luciana da Conceição dadauk ne’e moris ho kondisaun gráve, tanba la iha kbi’it atu sustenta nia oan sira na’in 7, hafoin nia laen kaben Domingos Magalhães mate iha loron 16 fulan-Maiu tinan 2022.
“Inan-Faluk ho oan na’in 7 ne’e, oan mane bo’ot na’in-2 hanesan Armando Magalhães la kontinua nia estudu iha Universidade, no oan mane Segundu Júlio Magalhães, hapara nia eskola iha ensínu sekundaria 1912 Manufahi, no oan feto Ermelinda da Conceição, ho nia alin sira seluk ne’ebé sei ki’ik, agora dadaun eskola iha Rainha da Paz Weberek”, nia informa.
Família inan-Faluk Domingos da Costa hateten, momentu inan-Faluk ne’e nia katuas oan sei moris, naran tama iha lista atu hetan uma Naroman ba Povu, maibé nia kaben mate, la hetan fali. Ho situasaun ne’e, oan balun bá hela ona ho ema seluk, tan ne’e presiza tebes tulun hosi governu.
Entertantu, ekipa News Roman ba Sosiedade (ARS) informa ona situasaun ne’e ba xéfi Gabinete administrasaun Munisípiu Manufahi Filomeno Tilman, hodi informa kedas ba Administradór Munisípiu Manufahi, iha ne’ebé Administradór Munisípiu trasa kedas planu atu iha Sexta-feira (13/10) semana ne’e, sei tun direitamente hodi haree situasaun ne’ebé inan-Faluk ho oan na’in 7 infrenta iha aldeia Weberek, suku Dotik postu administrativu Alas.
Oan ki’ak na’in 7 ne’e kompostu hosi Armando Manglhaes tinan 18, Júlio Magalhães tinan 17, Ermalinda da Conceição Tilman ho tinan 14, no Jorge Magalhães, Maria Maia Magalhães, Benjamin Manglhaes, no Birgina Magalhães ho Idade husi tinan 5 mai kraik.
Jornalista : Júlio Guterres Bosi-Cai “Júgu”
Editór Testu : Amito Qonusere Araújo
loading="lazy" />