G-NEWS (DILI) – Diresaun Nasionál Ikatan Keluarga Silat Putra Timor Leste (IKS-PTL) Kera sakti, sei realiza formasaun kona-ba Dezenvolvimentu Desportiva, durante loron tolu, hahú hosi Sexta-Feira to’o Domingu (25-27/08/2023) iha Salaun Laline Larigutu, CNE, Dili.
Prezidente Komisaun Organizadora ba eventu Formasaun Nasionál Aniceto de Carvalho, informa ba G-News, Kuarta-Feira (23082023) iha Sede Nasionál Organizasaun Bebonuk-Dili katak, formasaun ne’e atu forma treinador sira liu-liu membru organizasaun Arte Marsiais IKS-PTL iha área téknika, Juri no arbitrazen ba kompetisaun iha nível nasionál no sukursal sira.
“Objetivu hosi atividade ida ne’e mak hanesan prezerva no kultiva domin ba nasaun Timor Leste liuhosi organizasaun IKS-PTL. Kuda espíritu desportivu iha atmosfera kompetisaun saudável. Nune’e mós atu fortalese sentidu fraternidade no solidariedade iha fileira família bo’ot IKS-PTL, no esforcsu atu promove no konkista atleta sira hosi membru sira IKS-PTL nian”. Tenik Aniceto.
Tuir nia, organizasaun arte marsial ho nia natureza tékniku movimentu ne’ebé kombina hosi Silat ho Kungfu ne’ebé atu forma nia kuadru no membru sira sai independente, iha karáter nobre no solidária, alta abilidade, espíritu kavaleiru (Satria), saudável iha fíziku no espiritualmente.
“Rekursu previstu IKS-PTL sei la útil bainhira la dezenvolve intensivamente. Depois tinan 8, Organização IKS-PTL legalmente eziste no bele hala’o fila fali nia atividade iha rai-laran tuir segundu diretiva Ministériu Justisa. Programa prioridade sira ne’ebé organizasaun arte marsiais (OAM) IKS-PTL Kera Sakti sei hala’o, lihhosi apoiu fundus hosi Governu ba Funsionamentu sekretáriadu, resensiamentu membru, konstrusaun sede, kompetisaun nasionál ba organizasaun no formasaun ba treinador sira hosi IKS-PTL”, nia aumenta tán.
Formasaun no kompetisaun nasionál IKS PTL kera sakti sei realiza simultaneamente. Atividade formasaun sei foka liu ba formasaun téknika (combate), regra sira no modalidade avaliasaun ba kompetisaun. Alvu hosi atividade refere mak ofisial ka treinador sira hosi sukursal, membru prinsipal sira (Juri no arbitrajen) ne’ebé toma responsabiliza ba kompetisaun sira.
Objetivu-jerál hosi eventu ida mak atu kapasita no hasa’e koñesimentu treinador sira nian kona-ba téknika, regra kompetisaun sira no avaliasaun tuir padraun Federasaun Nasionál Silat Timor Leste (FESTIL). Alende ne’e atu produs mós atleta sira iha alta kompetente hodi representa IKS-PTL no Timor Leste iha kompetisaun nível nasionál, rejionál no internasionál.
Tema prinsípal ba Formasaun mak atu Profesionaliza pratikante arte marsiais IKS PTL Kera Sakti hodi kontribui ba Dezenvolvimentu Nasionál, área desportu nian, ho orador sira maihosi autoridade Relijiozu, Konselleiru Sentral IKS Kera Sakti Indonézia, no Ekipa sira hosi estrutura Diresaun Nasionál IKS PTL Kera Sakti Timor Leste nian.
Jornalista : Ekipa G-News
Editór Testu : Amito Qonusere Araújo
loading="lazy" />