Família SDB tuir misa tinan 100 Salezianu sira iha Timor-Leste

banner 120x600
86 Views

G—NEWS (FATUMACA-BAUCAU) — Loron 31 Janeiru iha signifikadu importante tebes ba Família Saleziana iha mundu tomak, inklui iha Timor-Leste. Iha loron ne’e, Igreja Katólika selebra festa Saun João Bosco nian, fundadór Kongregasaun Saleziana no figura importante iha ministériu ba foin-sa’e sira.

Saun João Bosco dedika nia moris ba edukasaun no evanjelizasaun, ho foku partikulár ba foin-sa’e sira, liuliu sira ne’ebé mai husi orijen kiak no marjinalizadu. Nia fiar katak dalan di’ak liu atu forma personalidade di’ak maka liuhosi “Sentidu Komún, Relijiaun no Domin”—prinsípiu sira ne’ebé sai baze ba sistema edukasionál ne’ebé nia kria.

banner 325x300

Ba Família Saleziana, selebrasaun ida-ne’e nu’udar momentu reflesaun kle’an nian, oportunidade ida atu selebra, reza no hafoun empeñu ba misaun Saleziana. Iha eskola saleziana oioin, parókia, sentru foin-sa’e sira no komunidade relijioza sira iha mundu tomak, inklui iha Timor-Leste, hala’o misa Agradesimentu nian. Atividade kulturál no eventu sira ne’ebé envolve juventude sira mós halo parte iha selebrasaun ne’e.

Iha tinan 2025, selebrasaun ne’e sei iha signifikadu kle’an liután ba Timor-Leste, tanba sei koinside ho aniversáriu ba dala 100 Espedisaun Saleziana dahuluk to’o iha rai ida-ne’e. To’o ne’e marka inísiu viajen misaun saleziana nian iha Timor-Leste, ne’ebé kontinua iha impaktu boot, liuliu iha edukasaun no formasaun karakter jerasaun foin-sa’e sira-nian iha rai ida-ne’e.

Misa abertura ba Komemorasaun Tinan Atus Prezensa Saleziana iha Timor-Leste, ne’ebé hala’o iha Santuáriu Maria Auxiliadora iha Fatumaca-Baucau, iha signifikadu importante tebes, tantu espirituál, edukativu no istóriku. Dezde espedisaun saleziana dahuluk to’o iha rai ne’e, Fatumaca sai nu’udar sentru boot ba fiar, edukasaun no formasaun ba foin-sa’e Timor-Leste nian.

Santuáriu Maria Auxiliadora iha Fatumaca la’ós de’it fatin ba orasaun, maibé sai mós símbolu ba misaun saleziana iha Timor-Leste. Liuhusi evanjelizasaun, edukasaun no formasaun, salezianu sira kontinua banati tuir Karizma Don Bosco nian hodi tulun jerasaun foin-sa’e Timor-Leste nian iha harii futuru ida ne’ebé di’ak liu.

Selebrasaun sentenáriu ida-ne’e iha signifikadu importante tebes ba ita-nia rain, tanba marka sékulu ida evanjelizasaun, edukasaun no servisu Kongregasaun Saleziana nian ba povu Timor-Leste, liuliu ba foin-sa’e sira.

Misa agradesimentu ne’ebé hala’o iha Igreja Santuáriu Maria Auxiliadora Fatumaca ne’e lidera husi Monseñor Marco Sprizzi reprezentante Santa Sé iha Timor-Leste. Iha selebrasaun ne’e partisipa mós husi Prezidente Repúblika José Ramos Horta, Líder Nasionál Lere Anan Timur, Provedór Virgílio da Silva Guterres ‘Lamukan’, Membru Parlamentu Nasionál, família Saleziana Don Bosco, no sarani sira husi oin-oin sírkulu sira.

Jornalista        : Martinho Belo

Text Editor      : Amito Qonusere Araújo

relavante