FC Lori manán 1 lugar iha Tasa Natal 2025 iha Chai-Loré

G—NEWS (LOSPALOS) — Torneiu futsal Natal Cup 2025 hala’o ho susesu hodi selebra Natal 2025, hodi promove mensajen dame iha komunidade nia leet. Eventu ne’e envolve ekipa futsal lokál oioin no hetan apoiu hosi komunidade, autoridade seguransa, no veteranu sira.

Iha meia-finál, FC Zelta hasoru FC Ilisakawey iha jogu ne’ebé maka’as no kompetitivu. FC Zelta ikusmai sai vitoriozu ho skor 6-4, hodi asegura terseiru lugar iha torneiu refere.

Entretantu, jogu ikus ne’e tau FC Vaurenu hasoru FC Lori. Iha finál, FC Lori hala’o ho efetivu liu no manán 4-1, nune’e sai hanesan primeiru lugar iha Taça Natal 2025 nian.

Iha nia intervensaun, Prezidente Komisaun Aje Brasil hato’o importansia klean hosi torneiu ne’e.

“Ami hala’o atividade ida-ne’e hodi selebra Natál 2025 ho foin-sa’e sira, enkuantu kuda mós valór dame iha moris komunitáriu nian,” nia afirma.

Sarjentu Nazario Cabral Komandante Polisia Suku Lore Primeiru mós hato’o nia apoiu ba eventu ne’e.

Nia subliña importánsia atu mantein morál no orden durante torneiu tomak.

“Ha’u husu ba jogadór sira hotu atu mantein sira nia entuziazmu, mantein desportividade, no garante eventu ida-ne’e la’o ho seguru to’o nia konkluzaun,” nia hatete.

Entuziazmu hosi komunidade sai evidente iha jogu tomak. Espetadór ida hatete, “Ami kontente tebes ho atividade ida-ne’e tanba ida-ne’e lori ksolok no hametin relasaun entre komunidade sira.”

Apoiu pozitivu hosi espetadór sira ba ekipa ida-idak mós hasa’e jogadór sira-nia espíritu iha kampu laran.

Envolvimentu komunidade, autoridade lokal nian mós sai hanesan pontu aas ida hosi atividade ida-ne’e.

Reprezentante komunidade ida hatete, “Ami partisipa atu apoia joven sira hodi kontinua mantein unidade no dame liuhosi desportu.”

Bazeia ba observasaun durante torneiu, Natal Cup 2025 hanesan kompetisaun futsal no plataforma sosiál ida ne’ebé efetivu hodi hato’o mensajen dame nian.

Espetadór barak hein katak atividade hanesan bele hala’o fali iha tinan oin.

Rezidente ida hatete, “Ami hein katak Komisaun bele organiza fali torneiu ida-ne’e iha tinan oin tanba ida-ne’e fó benefísiu tebes ba joven sira.”