FFTL prepara ba liga futebol feminino 2025/2026

G—NEWS (DILI) — Federasaun Futebol Timor-Leste (FFTL) liuhusi departamentu kompetisaun eventus no Assosiasaun Futebol Feminino hahú ona halo preparasaun ba Liga Futebol Feminino ba époka 2025/2026.

Iha loron Sabadu, 24 Maiu 2025, Diretór Kompetisaun FFTL, Sr. João F. Campos, konvoka ona sorumutu ida iha sala reuniaun FFTL hodi deskuti kona-ba mekanizmu preparativu sira.

Reuniaun preparativu ne’e, marka prezensa husi Sekretáriu Jerál FFTL, Sr. José Adilson de C. Ribeiro, Prezidente Asosiasaun Futebol Feminina Timor-Leste, Sra. Engrácia Pimentel Fernandes, Diretór Departamentu dezenvolvimentu no parseria internasionál, Sr. Jánio Tilman, Women’s Officer, Sra. Lízia Magno no reprezentante sira husi klubes ne’ebe sei kompete iha Liga ne’e rasik.

Sorumutu ne’e, Sekretáriu Jerál FFTL, Sr. José Adilson de C. Ribeiro mós sente kontente hodi hato’o bem-vindu no fó gratidaun ba reprezentante klubu sira ne’ebe marka prezensa iha reuniaun refere.

Alende ne’e, Prezidente Assosiasaun Feminino Timor-Leste, Sra. Engrácia Pimentel Fernandes mós senti orgull tanba ne’e, sai hanesan momentu istóriku ida iha nia lideransa ho formatu Liga full competitions.

Durante reuniaun, Diretór Kompetisaun FFTL, Sr. João F. Campos, aprezenta ona komisaun organizadóra konjunta ne’ebé kompostu husi Assosiasaun Futebol Feminino no Departamentu Kompetisaun & Eventus FFTL ho objetivu fó dinámika foun no fortalese organizasaun kompetisaun sira iha futuru.

Nune’e, deskute mós kona-ba detallu orsamentu, kalendáriu jogu, preparasaun téknika inklui faze rejistrasaun no jogu play-off inklui preparasaun lojístika ba kompetisaun.

Garante kualidade liga futebol feto no fornese estrutura liga ida ne’ebé kompetitivu maka responsablidade ba klube sira afirma katak prontu no preparadu ona atu kompete iha Liga Futebol Feto époka 2025/2026.

Jogu sira ba Liga Feminino 2025/2026 sei iha total 90 jogus, 18 jornadas iha fulan 5 nia laran no sei realiza iha estádiu sira iha Díli, Manatuto no Ermera.

Bazeia ba preprativu sira ne’e, FFTL kontinua kompromete atu dezenvolve no promove futebol feminino iha Timor-Leste ho padraun profisionál no inkluzaun feto iha desportu.