G—NEWS (DILI) — Partidu FRETILIN hato’o ninia kondenasaun maka’as ba hahalok asédiu, abuzu no esplorasaun seksuál hotu-hotu. Hahalok hanesan ne’e la aseitavel tanba viola dignidade umana no labele iha fatin iha sosiedade ida ne’ebé buka atu sai justu, demokrátiku, no respeitu ba estadu direitu.
Komunikadu imprensa ne’e fó sai, hafoin estudante universitáriu UNTL halo asaun hasoru dosente ida ho inisial MB tanba deskonfia envolve iha prátika asediu seksual durante ne’e.
Liuhosi komunikadu ne’ebé G—NEWS asesu, tersa-feira (07102025) katak, partidu FRETILIN toma ona nota kona-ba alegasaun sira foin lalais ne’e hasoru indivíduu sira ne’ebé deskonfia komete aktu sira hanesan ne’e no apoia tomak apelu atu keixa no alegasaun hotu-hotu tenke trata ho seriedade, transparénsia, no responsabilidade enkuantu tane aas prinsípiu estadu direitu nian. Labele tolera forma impunidade no laiha buat ida ne’ebé aas liu FRETILIN nia kompromisu ba justisa no direitus umanus.
“Ami husu ba autoridade kompetente sira atu hala’o investigasaun kle’an no imparsiál ba kazu sira ne’ebé relata ona, hodi garante katak, karik hetan konfirmasaun, sira ne’ebé responsável hetan kastigu tuir lei haruka. Iha tempu hanesan, ami subliña nesesidade urjente atu proteje vítima no sobrevivente sira, hodi garante sira apoiu no seguransa.” Haktuir iha komunikadu imprensa.
FRETILIN fiar metin katak, Timor-Leste tenke tau iha fatin mekanizmu sira ne’ebé forte no adekuadu hodi lida ho prátika asédiu seksuál, abuzu no esplorasaun iha forma hotu-hotu iha instituisaun públika no privada hotu-hotu iha ita-nia sosiedade ne’ebé garante katak alegasaun ruma sei trata ho di’ak no ho rigorozu no mós garante katak laiha rekorrénsia ba hahalok umanu sira hanesan ne’e.
FRETILIN reafirma ninia solidariedade ho vítima hotu-hotu, hodi enkoraja relatóriu formál kona-ba kazu sira iha instituisaun públika no privada sira, no mós iha ambiente komunidade no família nian. Só liuhosi denúnsia no responsabilizasaun maka bele halakon ho efetivu kultura silénsiu no impunidade, responsabiliza autór sira no asegura justisa.
“FRETILIN fó parabéns ba sira ne’ebé iha korajen atu ko’alia hasoru desrespeitu ba ema nia direitus umanus ne’e no enkoraja ema seluk ne’ebé hatene kazu sira hanesan ne’e ka vítima husi sira atu denunsia hahalok sira hanesan ne’e.”
FRETILIN repete ninia kompromisu atu harii sosiedade ida ne’ebé bazeia ba respeitu, igualdade, no dignidade, iha-ne’ebé aktu asédiu seksuál, abuzu no esplorasaun hetan konfrontu iha ninia forma hotu-hotu.
loading="lazy" />