G-NEWS (DILI) – Organizasaun Fundasaun Mahein halo ona investigasaun kle’an liután notísia kona-ba pesoal hosi Polícia Científica de Investigação Criminal (PCIC) ne’ebé husu osan seguransa ba família fugitivo Arnolfo Teves Jr.
Liuhosi konferénsia Imprensa, tersa-feira (09042024) iha edifísiu Fundasaun Mahein, Bairo-Grilos, Dili, Diretór Ezekutivu Fundasaun Mahein Nelson Belo hateten, Organizasaun ne’e identifika ona katak, membro PCIC ne’ebé assume kargu xefia, hodi aktus ne’e.
“Ho notísia ne’e Fundasaun Mahein (FM) investiga kle’an liu tan notisia ne’e no identifika katak membru PCIC ida ho títulu investigador Xefe no kargu Xefe departamentu importante mak envolve iha kazu ne’e. Kazu ne’e nia kronolójia mak pesoal PCIC halo kontaktu via WhatsApp ho língua Inglêz (mensagem no kontaktu voice) ho Arnolfo Teves, Jr nia oan-mane kona-ba nia aman nia kondisaun iha Estabelesimentu Prizional Becora, Dili. Hosi kontaktu ne’e, pesoal PCIC husu osan ho montante US$ 2,000 nu’udar osan seguransa ba Arnolfo Teves, Jr. iha prizaun”, haktuir liuhosi konferénsia imprensa.
Nelson Belo esplika, Fundasaun Mahein (FM) haree kazu ne’e importante tebes no presiza asaun konkretu hodi garante rezolusaun tuir lei no regra ne’ebe iha.
“Komete krime ne’ebé rejistu Ministériu Públiku, no Comissão Anti-Corrupção ne’ebé parte sira konstitui ona hanesan arguidu ba krime burla agravadu tanba deskonfia simu vítima sira-nia osan (montante hale’u $700.00) inklui abusu poder tanba utiliza edifísiu PCIC hodi resolve problema partikular balun. Prosesu kiriminal la’o hela hasoru pesoal refere maibé prosesu disiplinar deskonfia superior PCIC nian arkiva tiha ona tanbá ninia ema confiansa”, Nelson Belo esplika.
Ho aktus ne’e, Nelson Belo, konsidera, iha polémika no insidente seluk ne’ebé membro sira hosi Polícia Científica de Investigação Criminal (PCIC) komete, liu-liu mós lideransa sira, iha ne’ebé Fundasaun Mahein konsidera, futuru instituisaun PCIC sei iha inserteza hela.
“Envolve mos kazu utiliza armas hodi ameasa ema seluk iha PCIC, tanba problema feto, no vítima hato’o keixa bá PCIC nian, maibé la hola medida tanba individu refere pertense superior PCIC nia ema konfiansa”. Nelson Belo ko’alia ba Jornalista sira.
Aleinde ne’e, Fundasaun Mahein mós identifika, lideransa PCIC mós uza poder hodi fasilita fó treinu ba superior PCIC nia oan-mane utiliza armas PCIC nian, no prátika tiru iha carrega de tiro PCIC nian, iha área Kaitehu, Munisípiu Liquiçá. Kazu ne’e konsege sai polêmika iha tinan 2023 nia rohan, maibe to’o agora iha nonok nia laran.
Tuir faktus ne’ebé Fundasaun Mahein identifika katak, iha fulan-Marsu tinan 2024, pesoal PCIC sai hanesan testemuña ba kazu Korupsaun ne’ebé envolve membro PCIC, iha prosesu konkursu limpeza iha PCIC ne’ebé akontese iha tinan 2021.
Nelson Belo konklui katak, ho polêmika sira ne’ebé akontese iha tinan 2023 nia rohan, no to’o ohin loron envolve pesoal balun kontinua hakiak kultura impunidade iha PCIC, tanbá pesoal PCIC ne’ebé envolve iha kazu disiplinar no kriminal la iha prosesu no arkiva husi superior PCIC, tanba kultura impunidade no membru PCIC sente hetan protesaun hosi superior, aktu disiplinar no kriminal kontinua komete husi pesoal PCIC.
Nia konsidera, polítika Governu ba reforma PCIC, liu-liu troka de’it membru sira ne’ebe superior la gosta, no la afavor ba interese partikular, ne’e haburas no hametin liu-tan impunidade no hafraku lei no regulamentu, sei hafraku instituisaun no mos hafoer imajen estadu.
Fundasaun Mahein rekomenda ba órgaun estadu sira atu tau matan ba servisu PCIC, liu-liu atu investiga no fiskaliza urjente.
To’o informasaun ne’e fó sai, G-News seidauk hetan komentáriu hosi lideransa PCIC nian.
Editór Testu : Amito Qonusere Araújo
loading="lazy" />