G-NEWS (DILI) — Ministériu Negósiu Estranjeiru no Kooperasaun (MNEK) liu hosi kolaborasaun ho Austrália nia programa Parseria ba Prosperidade Inklusivu (PROSIVU), organiza workshop kona-ba “Timor-Leste nia Adezaun no Integrasaun ba Komunidade Ekonómia ASEAN – Negosiasaun Komérsiu no Investimentu” hosi loron 24 to’o 28 fulan-Juñu 2024 iha Ótel Novo Turismo, Dili, Timor-Leste.
Tuir komunikadu Imprensa ne’ebé G-NEWS asesu, segunda-feira (24062024) katak, Timor-Leste ho dilijente prepara an no kumpre hodi adere ba akordu protokolu no mós kuadru jurídiku sira iha âmbitu ASEAN, inklui mós Komunidade Ekonómia ASEAN nian. Rekezitu sira ne’ebé sei kumpre mak hanesan asesu merkadu ba sasan no servisu nian, movimentu ema no investimentu.
Hodi apoiu esforsu hirak ne’e, MNEK, nu’udar Ministériu Koordenador adezaun ba ASEAN nian hamutuk ho PROSIVU, programa hosi Austrália nian organiza ofisiais hosi governu no mós Ministériu relevante sira nune’e mós pesoal negosiador tékniku sira, hodi tuir formasaun durante loron lima ho rigorozu kona-ba negosiasaun komérsiu no investimentu nian.
Iha komunikadu Imprensa ne’e ko’alia katak, Formasaun ne’e sei eleva koñesimentu no abilidade partisipante sira hodi dezenvolve kalendáriu kona-ba Timor-Leste nia asesu ba merkadu ASEAN nian no mós sei ajuda hodi prepara no envolve an iha diskusaun no negosiasaun signifikante sira haktuir husi kalendáriu Estadu Membru ASEAN nian.
Vise-Ministra ba Asuntu ASEAN nian, Milena Rangel afirma “Timor-Leste totalmente iha kompromisu hodi sai membru plenu ASEAN no garante ho kapasidade sufisiente hodi implementa kompromissu ASEAN nian ho sentidu hodi alkansa objetivu integrasaun rejionál.
“Bainhira ami inisia serbisu konaba kalendáriu adezaun ba merkadu nian, haktuir husi rekerimentu mapa roteiru nian, formasaun konaba negosiasaun komersiu no investimentu ASEAN nian, nee sai momentu oportunu tebes hodi ajuda Governu ho kompetênsia nesesária sira hodi prepara kalendáriu ho susesu iha prosesu negosiasaun ba ASEAN”, governante ne’e ko’alia, liuhosi komunikadu imprensa ne’ebé G-NEWS asesu.
Iha okaziaun hanesan, Adjunta Xefe Missaun Embaxada Austrália iha Timor-Leste subliña “parte importante husi adezaun ba ASEAN mak negosiasaun, asina no implementa intrumentu legais importantes sira, hodi hetan rezultadu ne’ebe di’ak liu iha komérsiu no ekonomia Timor-Leste nian.
Austrália sei kontinua apoiu Timor-Leste nia jornada iha adezaun ba ASEAN, no hakarak atu kontinua fornese apoiu ba Governu Timor-Leste hodi lori Timor-Leste iha prosesu ba adezaun no integrasaun ASEAN nian”.
Editór Testu : Amito Qonusere Araújo
loading="lazy" />