G-NEWS (DILI) — Prezidente Repúblika (PR) José Ramos Horta hahú vizita serbisu signifikativu ida ba Portugál hodi abranje série ida hosi kompromisu sira ho perfil aas ne’ebé foka ba dame, edukasaun no relasaun internasionál sira.
Prezidente Ramos-Horta nia itineráriu nakonu ho eventu oioin no iha impaktu. Nia sei hahú ho enkontru ho estudante sekundáriu sira hosi munisipiu Cascais ba sesaun Pergunta no Resposta interativu ida.
Tuir mai Prezidente sei partisipa iha abertura Konferensia Estoril nian iha Kampus Nova SBE Carcavelos, ne’ebé sentra iha tema “Tempu atu Hanoin Hikas.”
Destake ida hosi vizita ne’e maka Prezidente nia Diskursu kona-ba Dame, iha ne’ebé nia sei ko’alia kona-ba tópiku krusiál kona-ba lidera nasaun sira ba dame ne’ebé dura.
Diskursu ida ne’e sei konta ho estimadu prezensa husi Prezidente Portugal Marcelo Rebelo de Sousa, tuir kedas ho enkontru informál entre lider na’in rua ne’e. Prezidente Ramos-Horta nia oráriu inklui mós vizita komprensivu ida ba Kampus Nova SBE no Espozisaun Rethink Hub. Envolve ho komunidade akadémika, Prezidente Ramos- Horta sei halo entrevista ho estudante mestradu sira hosi “Klube Estudante Politika” no hasoru malu ho mídia portugés sira.
Prezidente sei iha sesaun enkontru no kumprimenta ho lideransa husi Institutu Politika Públika Nova, hodi reforsa Prezidente nia kompromisu atu haburas kooperasaun internasionál no troka koñesimentu.
Vizita ne’e konklui ho Prezidente Ramos-Horta simu Prémiu Literáriu Guerra Junqueiro iha Porto iha loron 26 kalan. Prezidente Ramos-Horta subliña importánsia hosi vizita ida-ne’e.
“Viajen ba Portugál reprezenta liu duké de’it kompromisu diplomátiku ida. Ida-ne’e hanesan oportunidade ida atu hametin ligasaun entre Timor-Leste no Portugál, hodi envolve ho foin- sa’e sira ne’ebé maka sai hanesan ita-nia futuru líder sira, no atu kontinua ita nia diálogu ne’ebé la’o hela kona-ba dame no harii nasaun Liuhosi fahe esperiénsia sira no haburas kooperasaun, ami loke dalan ba futuru ida ne’ebé pasífiku no prósperu liu ba nasaun hotu- hotu.”
Vizita ne’e hatudu ligasaun forte entre Timor-Leste no Portugál no destaka Prezidente Ramos-Horta nia kompromisu metin atu haburas pás, edukasaun, no kooperasaun internasionál.
Entertantu vizitasaun nee durante semana ida hahu husi loron 22 too 27 fulan-Outubru.
Jornalista : Martinho Belo
Editór Testu : Amito Qonusere Araújo