G-NEWS (BOBONARO) – Relasiona ho sidadaun sira hosi suku Lourba no Carabau postu Bobonaro ne’ebé ataka malu hodi kria instabilidade iha komunidade nia leet.
Hosi kazu ne’e, uma populasaun hamutuk-10 hetan sunu mutuk, uma-3 hetan estragus, inklui kiosk-2. hosi akontesimentu ne’e, ema na’in-7 mak sai vítima, iha ne’ebé na’in-3 hetan grave no transfere kedan ba ospitál referral Maliana, no na’in-4 hetan kanek kaman, ne’ebé hetan tratametu iha sentru saúde Bobonaro.
Komandante Polísia Munisípiu Bobonaro Superintendente Xefe António Maria de Sá, ba G-News, Sexta-feira (03112023) kalan esplika kona-ba kronolójia hosi kazu ne’e.
“Ne’ebé ohin sira hosi Carabau tesik ba, asaltu tiha sira suku Lourba entaun uma 10 mak hetan sunu mutuk, uma-3 hetan estragus, no kiosk-2 hetan estragus. Hosi parte sira ba asaltu Carabau nian ne’e, ema na’in-7 mak hetan vítima, tantu na’in-3 grave, no na’in-4 seluk kaman. Na’in-3 ohin ita evakua kedan ho ambulânsia ba Maliana hetan tratamentu iha ne’ebá, no ida mak ohin hetan evakua lori ba Dili tanba ne’e todan, no na’in-4 seluk iha hela sentru klínika Bobonaro”, Superintendente Xefe Polísia ne’e esklarese.
Superintendente Xefe António Maria de Sá esplika, akontesimentu iha Suku Lourba, alarga ne’ebé taa, hahú hosi membru organizasaun arte marsiais IKS Kera Sakti hasoru membru KORK iha Suku Usikai, postu Zumalai munisípiu Covalima.
“Kazu ne’e hahú hosi dia 2 novembru orseik loron finadu nian, akontese uluk iha Suku Usikai postu administrativu Zumalai munisípiu Covalima. Bainhira ita nia sidadaun ida hosi Lourba ba tau ai-funan iha Suku Usikai, iha ninia banin sira, ne’ebé nia hetan taa hosi nia banin rasik ho ninia rian rasik. Ninia motivu ne’e tanba kazu ne’e hosi organizasaun ne’ebé la hanesan (ne’ebé halai ba GAM). Ida vítima orikalan ne’e hetan taa hosi parte GAM KORK, ida fali suspeitu hosi ninia banin no rian rasik ne’e hosi GAM 80-IKS”, Komandante Polísia Munisípiu Bobonaro ne’e esplika ba G-News, sexta-feira (03112023).
“Vítima ba kazu ne’ebé akontese (02112023) orikalan lori kedan ba sentru saúde Lourba hodi halo tratamentu médiku”, Superintendente Xefe ne’e haktuir tán.
Tui Superintendente Xefe António, iha sexta-feira madrugada, parte rua kontinua nafatin iha suku Lourba ho Carabau, ne’ebé liga ba Grupu Arte Marsiais (GAM) ho Kolimau2000 hosi Grupu Arte Rituais (GAR).
“Mai fali iha Lourba ho Carabau nian mak hosi Arte Ritual Kolimau2000 ho GAM-3. Liga mós ba sira balun lanu tanba maihosi Dili, mai buka malu iha ne’e, ne’e mak afeta hotu ba ema lokál’, António afirma tán.
“Hun loloos hosi kazu ne’e mak GAM no GAR. Investigasaun sei lao hela tanba vítima tantu suspeitu sira sei kanek hela ne’ebé agora sei submete ba tratamentu saúde, depois di’ak tiha mak ita investiga sira tanba sira ne’e hotu vítima no mós suspeitu dala ida”, Superintendente Xefe António Maria de Sá esklarese kona-ba ne’e.
Atu responde kona-ba informasaun ne’ebé espalla iha públiku kona-ba akontesimentu ne’e afeta mós hosi sukuismu, Superintendente Xefe António Maria de Sá hateten, ida ne’e hanesan feto-san antigu nian, uluk kedan hodi uza lia-fuan sira ne’e maibé influênsia boot liu mak GAM no GAR.
Oras ne’e dadauk situasaun seguransa kontroladu tanba prezensa hosi forsa F-FDTL iha Tunubibi no Altu Lebos, hodi estabelese kedan postu seguransa iha Suku Lourba no Carabau, postu administrativu Bobonaro munisípiu Bobonaro.
Jornalista : Ekipa G-News
Editór Testu : Amito Qonusere Araújo
loading="lazy" />