Hosi Jaco, Ramelau to’o Tasitolu: vestuáriu tradisaun no espiritualidade iha turizmu Timor-Leste

G—NEWS (DILI) — Turizmu maka buat dahuluk ne’ebé mundu haree bainhira ko’alia kona-ba nasaun ida. Ba Timor-Leste, nasaun joven ida ne’ebé sei navega hela ninia dalan pós-independénsia, setór ida-ne’e oferese oportunidade ekonómika no meiu ida ba diplomasia kulturál.

Hosi tasi-ibun área munisípiu Lautem nian, to’o foho Ramelau iha munisípiu Ainaro, hosi illa Jaco ne’ebé hakmatek to’o Cristo Rei ne’ebé aas iha kapitál Dili nia leten, Timor-Leste kaer rikusoin ne’ebé bele tau nia iha mapa destiñu sudeste aziátiku nian. Maibé iha beleza ida-ne’e nia okos iha pergunta boot ida: oinsá maka nasaun ida-ne’e preparadu atu transforma potensiál ba realidade?

Iha foho hakmatek nia okos no tasi azúl ne’ebé namkari hosi ponta orientál Illa Timor nian to’o kosta súl Oecusse, iha potensiál boot ida ne’ebé seidauk aproveita didi’ak: turizmu, futuru ekonomia Timor-Leste nian no diplomasia kulturál.

Hosi tasi-ibun tropikál no foho sagradu ba fatin tradisionál no fatin koloniál sira, nasaun ne’e gaba-an ho paizajen ida ne’ebé oioin no úniku, maibé dalan ba turizmu klase mundiál nian nakonu nafatin ho obstákulu.

Iha Dili, área Cristo Rei sai hanesan fatin halibur malu ba joven sira ne’ebé haree turizmu nu’udar oportunidade osan-mean ida.

Olegario Cardos nu’udar estudante iha Universidade Nasionál Timor Lorosa’e (UNTL), subliña, governu tenke fó prioridade ba turizmu nu’udar prioridade dezenvolvimentu nasionál. Hanoin ne’ebé hanesan hato’o hosi João Ximenes, rezidente hosi Hera, ne’ebé fiar katak prezensa hosi turista bele iha impaktu diretu ba rendimentu hosi klase ki’ik sira.

Lian hosi Tasitolu, área ida ho signifikadu istóriku no espirituál, espresa tantu esperansa no setisizmu. Gloriana Exposto, negosiante ida, rekoñese governu nia pasu inisiál, hanesan hamoos tasi-ibun no hadi’a estrada. Maibé, nia fiar katak esforsu sira-ne’e la sufisiente atu kria destiñu turístiku ida ho klase internasionál. Sentimentu hanesan repete hosi rezidente lokál Marito Mendonça, ne’ebé hatete katak regulamentu no infraestrutura turizmu nian sei dook hosi realidade ne’ebé iha.

Iha Fatuhada, Ernestina Carvalho subliña, dezenvolvimentu labele konsentra de’it iha kapitál. Nia subliña, destiñu hanesan Illa Jaco iha munisípiu Lautém no tasi-ibun ho beleja furak iha matan, iha munisípiu Baucau mós merese hetan atensaun.

Eduardo Martins hosi Covalima hato’o esperansa ne’ebé hanesan katak turizmu tenke dezenvolve hanesan hotu iha munisípiu sira hotu.

G-NEWS nia monitorizasaun ba munisípiu 13 hatudu diversidade hosi paizajen turizmu nasionál:

• Dili koñesidu ho Cristo Rei, Tasi-ibun Areia Branca, no Tasitolu, íkonu turizmu relijiozu, istóriku, no tasi nian.
• Baucau furak ho Praia Wataboo no relíkia koloniál portugés sira ne’ebé hamriik nafatin ho majestuozu iha sentru sidade nia
• Lautém iha Illa Jaco ne’ebé moos, kultura Fataluku, no área ekoturizmu iha
• Viqueque kapas ho tasi-ibun no fatin istóriku sira luta nian, maibé ladún koñesidu tanba laiha promosaun.
• Manatuto oferese tasi-ibun furak iha estrada nasionál no fatin tradisionál sira ne’ebé prezerva nafatin tradisaun orál.
• Ermera, ho nia plantasaun kafé koloniál, hahú dezenvolve agro-turizmu no turizmu komunitáriu.
• Liquiçá iha tasi-ibun exótiku no gruta istóriku sira hosi era konflitu nian.
• Bobonaro famozu ba Marobo Hot Springs, pisina bee-manas naturál ho potensiál ba turizmu saúde nian.
• Covalima iha Tasi-ibun Suai no ai-laran ne’ebé moos no riku ho flora no fauna.
• Ainaro koñesidu hanesan dalan prinsipál ba foho Ramelau, Timor-Leste nia foho tutun ne’ebé aas liu no destiñu turizmu espirituál.
• Manufahi kapastebes hosi Same Beach no dalan ba área remota.
• Aileu, maski laiha tasi-ibun, oferese anin malirin, área natural, no potensiál ba turizmu ekolójiku no kulturál iha foho.
• Oecusse, ho estatutu Zona Ekonómika Espesiál, furak tebes ho Praia Pante Makassar no patrimóniu istóriku hosi koloniál portugés, maibé ninia dezenvolvimentu turizmu seidauk integra iha ekonomia lokál.

Iha munisípiu ida-idak, potensiál boot ida-ne’e dala barak hetan difikuldade tanba asesu ba estrada ne’ebé ladi’ak, falta eletrisidade, no falta fasilidade báziku.

José Belo, guia lokál ida iha Baucau, rekoñese katak dalabarak turista sira laran-rua atu hela períodu naruk tanba falta infraestrutura apoiu nian.

Helena Guterres, ativista ambientál ida iha Lospalos, kestiona tansá maka Illa Jaco ne’ebé furak nafatin la hetan atensaun másimu hosi governu sentral hodi bele dada turista internasional no lokál atu aproveita ninia beleza ne’ebé furak no kapas.

Iha Tibar, rezidente ida subliña nesesidade ba apoiu formasaun no lisensa ofisiál ba komunidade sira ne’ebé dezenvolve turizmu kafé. Entretantu, iha foho Ramelau, peregrinasaun no atividade akontese lahó padraun seguransa nian.

João Goncalves, ne’ebé G-NEWS kontaktu liuhosi telefone iha Domingu (17 Agostu 2025), dehan, promosaun sei laiha sentidu bainhira laiha fornesimentu instalasaun báziku sira hanesan bee-moos, eletrisidade, no saneamentu adekuadu.

Narrativa seluk mai hosi Metiaut. Etelvina Pinto argumenta, promosaun internasionál ne’e urjente duni, maibé governu tenke fornese nesesidade báziku hodi garante turista sira labele hasoru obstákulu.

“Promosaun bele loke odamatan sira, maibé instalasaun sira determina se odamatan sira-ne’e nakloke nafatin,” nia hatete.

Buat sira-ne’e hotu ilustra paradoksu boot ida: Timor-Leste gaba-an ho íkone turizmu ne’ebé kativa, hosi tasi-ibun tropikál to’o foho lulik sira, maibé laiha estratéjia nasionál ida ne’ebé sólidu duni.

Relatóriu 2023 ida hosi Banku Dezenvolvimentu Aziátiku nian hatete, nasaun ne’e iha oportunidade signifikativu iha ekoturizmu no turizmu bazeia ba komunidade. Entretantu, UNESCO Timor-Leste (2024) relata, prezerva kultura lokál maka xave ba exelénsia turizmu nian bainhira komunidade envolve diretamente.

Ho Planu Estratéjiku Turizmu 2025–2030, iha kompromisu atu hametin infraestrutura, hasa’e kapasidade rekursu umanu, no habelar promosaun internasionál. Esperansa mak turizmu sei la foti sae de’it nasaun nia oin, maibé sai mós fonte empregu, guarda kultura, no prova katak Timor-Leste prontu atu simu mundu ho maneira soberanu, kulturadu, no justu.

Timor-Leste nia paizajen turizmu hanesan livru nakloke ida, nia pájina nakonu ho istória natureza, kultura, no istória hein atu mundu atu bele lee. Maibé presiza nafatin kapa ida ne’ebé metin, hakerek ne’ebé klaru, no estratéjia ida ne’ebé dirije ho di’ak atu dada atensaun hosi públiku globál ida.

Infraestrutura ne’ebé organizadu ho di’ak, governasaun ne’ebé di’ak, no promosaun ne’ebé intelijente sei sai xave. Karik governu, no komunidade emprezarial servisu hamutuk, turizmu sei sai liu fali oportunidade potensial, maibe dalan konkretu ba futuru soberanu, kultural, no prósperu ba povu Timor-Leste tomak.

Antes ne’e, iha Fórum Investimentu Turizmu Timor-Leste 2024, hanesan eventu ida ne’ebé hala’o iha loron 21-22 fulan-novembru tinan 2024, iha Sentru Konvensaun Dili (CCD). Fórum inaugural ida ne’e ho objetivu atu hatudu Timor-Leste nia potensiál ne’ebé seidauk aproveita iha setór turizmu no atrai tantu investidór lokál no internasionál sira. Ida-ne’e sei halibur parte interesada xave sira, líder sira indústria nian, investidór sira, no reprezentante governu nian sira hosi rejiaun tomak.

Fórum ne’e trasa ona ninia objetivu atu promove oportunidade investimentu, estabelese Timor-Leste nu’udar destinu turizmu emerjente, haburas kolaborasaun, hasa’e klima investimentu, no enkoraja turizmu sustentável ba benefísiu longu prazu.

“Liuhusi kolaborasaun estratéjiku no investimentu ne’ebé responsavel, ita sei loke potensiál loloos husi indústria turizmu Timor-Leste nian, hodi kria futuru ida ne’ebé sustentável ba ita-nia nasaun no oferese oportunidade laiha paralelu ba investidór lokál no globál sira.” – dehan Vice Primeiru Ministru Timor-Leste, Francisco Kalbuadi Lay.

Fórum ne’e sei iha atividade oioin, inklui diskursu prinsipál sira hosi peritu indústria nian, diskusaun painél kona-ba tendénsia no oportunidade turizmu nian, no sesaun rede nian hodi fasilita parseria sira.

Ho prezensa prezensa maizumenus partisipante na’in 300, fórum ne’e antisipa partisipante lokál ne’ebé signifikativu, inklui membru Kámara Komérsiu no Indústria Timor-Leste (CCI-TL), Asosiasaun Hotelaria, Operadór Turístiku sira, Asosiasaun Kafé, no asosiasaun seluk ne’ebé iha relasaun ho turizmu.

Haree ba oin, fórum ne’e iha objetivu atu transforma ba eventu anuál ida, dada investidór potensiál sira atu esplora oportunidade luan iha indústria turizmu Timor-Leste nian.