G—NEWS (BAUCAU) — Inan-aman estudante husi Eskola báziku Filiál (EBF) terseiru siklu Buibau postu administrativu Baucau vila, kontribui osan kada fulan selu manorin espesifiku parsiál na’in rua hodi fó aprendisajen ba estudante sira.
Estudante EBF Buibau Sonia Quinau Ornai rekomenda ba Ministeriu Edukasaun atu koloka manorin rekrutadu material espesifiku, tanba atuál inan-aman selu professor parsial maibé balun ekonómia la sufisiente.
“Ami selu mestri na’in rua Matématika no Inglés, ami sente ladi’ak tanba inan-aman balun ekónomia uma laran laiha, entaun ami husu estadu koloka manorin mai ami nia eskola nune’e labele selu tan” reprezentante estudante EBF Buibau rekomenda.
Koordenadora EBF Buibau, Ana Maria Ornai rekoiñese, laiha manorin matéria espesifiku inglés no matématika, tanba ne’e parte eskola ho estrutura konsellu inan-aman no responsavel (KIAR) foti desizaun hamutuk bolu manorin parsiál materia espesifiku selu kada fulan dolar amerikanu 115 hodi hanorin estudante.
”Ami infrenta duni professor Matemátika no inglés maibé la’os ami eskola mak foti desizaun rasik osan mai husi inan-aman iha estrutura konsellu inan-aman no resposavel (KIAR) husu kontribuisaun apoiu ami profesores iha ne’e hanorin ita nia estudante sira husi setimu anu to’o nonu anu, tanba profesores terseiru siklu ema ne’ebe espesialidade matématika no ingles mak bele hanorin”.
“Ita labele koloka profesores naran de’it maske ita profesores hotu maibé material balun ita domina no balun la domina,” esplika kordenadora EBF Buibau.
Enkuantu EBF terseiru siklu Buibau rejita estudante hamutuk 95 kompostu primeira klase na’in 27, segundu klase na’in 38 no terseira klase na’in 35, enkuantu manorin iha na’in neen kompostu permanente na’in 4 no parsiál na’in 2.
loading="lazy" />