Indonézia fó apoiu másimu ba TL nia adezaun ba ASEAN

G—NEWS (JAKARTA) — Ministru Negósiu Estranjeiru no Kooperasaun, Bendito Freitas, hasoru-malu ho nia omólogu Ministru Negósiu Estranjeiru Indonézia, Sugio hodi relata mós kona-ba progressu adezaun Timor-Leste nian ba ASEAN.

Enkontru ne’ebé hala’o iha edifísiu MNE Pancica Jakarta ne’e, parte ida hosi ajenda vizita Ministru Negósiu Estranjeiru no Kooperasaun, Bendito Freitas nian ba nasaun ASEAN sira, hodi haforsa relasaun diplomátika no kooperasaun bilateral ho nasaun membru membru ASEAN sira.

Iha enkontru ne’e, Ministru Negósiu Estranjeiru Indonézia, Sugiono deklara, Governu Indonézia nafatin fó apoiu másimu Timor-Leste, bainhira iha 2011 Timor-Leste hahú hatama ninia aplikasaun atu sai membru ba ASEAN.

“Ita hetene katak, Governu Indonézia, desde Timor-Leste nia kandidatura ba membru ASEAN iha 2011, Indonézia fó apoiu másimu teb-tebes iha Governu anteriores, iha Ministru Negósiu Estranjeiru sira sempre fó apoiu másimu atu Timor-Leste bele sai parte integrante hosi organizasaun rejionál ida-ne’e,” hatete Ministru Bendito.

Governu Indonézia mós manifesta sira-nia vontade apoiu ba Timor-Leste liu hosi kapasitasaun rekursu umanu ba funsionáriu públiku sira, ne’ebé oferese hosi Sekretariadu ASEAN nian iha Jakarta.

Iha simeira ASEAN ba dala 40 no 41 iha Phnom Penh Kambodia iha fulan-novembru tinan 2022, estadu-membru sira konkorda emprinsípiu Timor-Leste atu sai hanesan membru observadór ba ASEAN, nune’e bele partisipa ativamente iha enkontru hotu sira kona-ba ASEAN nian.

Nune’e ho vizita refere, bele heforsa liután relasaun Timor-Leste ho Indonézia, prinsipalmente Governu Indonézia hatudu sira-nia disponibilidade atu fó apoiu másimu no sira hakarak haree katak, Timor-Leste bele sai membru família ida iha ASEAN nian.

Entretantu, delegasaun ne’ebé akompaña Ministru Bendito Freitas iha enkontru ne’e mak hanesan, Embaixadór Timor-Leste ba Indonézia, Roberto Soares, Xefe Gabinete, Filomeno Rómulo dos Santos Lay, Diretór-Jerál Asuntu Bilaterál ba Ázia no Oseánia, Marcos da Costa no seluk tan. Enkuantu delegasaun Indonézia nian kompostu hosi, Ambassador Abdul Kadir, Director General for Asia-Pacific and Africa Affairs and Mr. Mirza, Director for Southeast Asia no seluk tan.