G-NEWS (BALIBO) – Konsellu Imprensa Timor Leste (KI) realiza forum editoriál nasionál ho tema“Papel editor ba asegura independénsia editoriál” hodi komemora loron nasionál liberdade imprensa ba daruak iha postu administrativu Balibo munisipiu Bobonaro, tersa-feira ne’e (15/10/2024).
Komemorasaun ba loron nasionál liberdade imprensa ne’e, atu hanoin hikas jornalista estranjeiru na’in lima ne’ebé mate iha Balibo, iha loron 16 fulan-Outubru tinan 1975, bainhira hala’o filmajen ba Forsa Indonézia sira ne’ebé hahú tama Timor liuhosi fronteira rai-maran.
Prezidente Konsellu Imprensa (KI) Otelio Oté iha nia diskursu hateten, forum editoriál nasional ne’e atu ko’alia oinsá defende salaun editor sai independente nu’udar dever ne’ebé durante ne’e luta nune’e labele iha intervensaun hosi poder polítika.
“KI loke forum editorial nasional hodi ko’alia kona-ba jestaun editor no oinsá defende salaun editor atu sai independente nu’udar dever ida ne’ebé durante ita luta atu nunee labele intervensaun husi ita nian politika sira, riku na’in sira, nomos ema individu ida ka grupo ida”.
“Hanesan ita hotu hatene problema kona-ba kapasidade salaun editor atu prevene intervensaun politika, ekonomia, privadu ka politiku durante tinan ida nee mídia Timor Leste kontinua enfrenta”, hateten Prezidente KI Otelio Oté
Iha sesaun auditorial, orador hosi akademista Armindo Moniz Amaral afirma, atu asegura independensia editoriál ka organiza redasaun ne’e brani ko’alia loos ba buat ne’ebé loos, brani ko’alia sala ba buat ne’ebe laloos no la inventa.
“Oinsá atu asegura independensia editor ne’e dezisaun ne’ebé mídia foti atu ko’alia lia-loos no ko’alia tuir loos, la inventa”.
Hosi ne’ebá ita hatene katak desizaun sira ne’e, konsekuênsia tenki ema mate, hetan intimidasaun mak lori sira ba prémiu nobel tamba ne’e mak oinsá atu brani ko’alia loos ba buat ne’ebé loos, brani ko’alia sala ba buat ne’ebé laloos”, Armindo Monis konklui kona-ba ne’e.
Armindo Moniz ko’alia liu-tán katak, liu hosi ita boot sira nia serbisu mak tenki kapasidade intelektual hodi hare faktus elabora iha ita-boot sira nia serbisu liu-liu produtu jornalistiku sira nomós atu defende ida ne’e tenki iha kualidade moral”, afirma Akademista Armindo Moniz Amaral.
Forum editorial ne’e realiza âmbitu komemorasaun loron nasionál liberdade nasionál ba dala-rua.
Jornalista : Martinho Belo
Editór Testu : Amito Qonusere Araújo
loading="lazy" />