G—NEWS (DILI) — Ekipa Aranha hosi Servisu Informasaun Polisia Nasional (SIPN) junta FP (Forsa Polisia) asegura, joven mane nain 3 ho inisial VSS (18), YGKS (20) no SRM (20), ne’ebe envolve kazu naok telefone iha loja Jaco Store iha area Suku Fatuhada, Postu Administrativu Dom-Aleixo, Munisipiu Dili.
Kazu ne’e akontese iha loron segunda dader 03 novembru 2025, haleu tuku 4 madrugada, wainhira vitima Jacob Goveia Leite, hamutuk hela ho familia hodi selebra loron finadu nian.
Suspeitu VSS alias Aldo, kaptura iha tersa madrugada iha nia rezidensia ne’ebe lokaliza iha area Kasnafar, Aldeia Beduku, Suku Tibar. Wainhira ekipa husu kona-ba motivu naok nian VSS tenta liki an halai sae tiha ba foho leten, maibe ho esforsu hosi ekipa servisu konsege kaptura fila fali ho evidensia telefone iPhone hamutuk 5 ne’ebe subar hela iha kama okos.
Iha fatin lahanesan YGKS alias Eby, ekipa konjunta lokaliza iha area Bebora, Suku Motael, Postu-Administrativu Vera-Cruz ho evidensia telefone iPhone hamutuk 2 wainhira toba hela iha nia banin sira nia uma. Iha loron tuir mai ekipa konjunta lokaliza tan SRM alias Ramadhan iha nia kolega nia uma iha Bairu Ran Manas, Aldeia Hali Mutin, Suku Bairo-Pite ho evidensia telefone iPhone hamutuk 3.
Asaun naok hosi suspeitu sira ne’e konsege kapta hosi CCTV ne’ebe instala iha loja laran. Video badak ho durasaun minutu ida ne’e hatudu joven nain-2 hatais faru kor matak uza ai suak sukit sai kadeaudu rooling door nian tama ba loja laran hodi baku rahun vidru etalase hodi foti telefone no nain rua seluk hein iha liur hodi asegura situasaun.
Durante prosesu identifikasaun, suspeitu sira rekuñese sira nia hahalok ne’ebe naok telefone hodi goja vida toba iha otel no hatudu fila fali evidensiabalu ne’ebe subar iha otel laran inklui rekolla fali telefone seluk ne’ebe fo ona ba sira nia kolega, doben balu fan ba ema seluk ho presu baratu ekipa servisu foti fila fali.
Hafoin remata prosesu identifikasaun ekipa servisu halo kedas auto entrega suspeitu sira hamutuk ho evidensia, ba Servisu Investigasaun Kriminál Nasional (SIKN), hodi halo prosesu investigasaun no detein durante 72h tuir lei ne’ebé iha, hafoin submete ona ba tribunál hodi tuir prosesu julgamentu no ohin loron 06 novembru 2025, desizaun final tribunal maka joven nain 3 ne’e sai duni autor prinsipal no kumpri kedas Prizaun Preventiva.
loading="lazy" />