G—NEWS (DILI) — Komandante Jerál Polísia Nasional Timor-Leste (PNTL) Komisariu Jerál Polísia Henrique da Costa ba jornalista sira klarifika pozisaun Komandu PNTL nian relasiona ho akontesimentu eletrisidade soke mate ema ida ho moras mental iha area Bidau Hospital Nacional Guido Valadares (HNGV) iha loron domingu (09/02) foin lalais ne’e.
Hafoin halo abertura ba serimonia Kolokiu Manual Polisiamentu Komunitariu ne’ebe hala’o iha Centro Formação Polícia (CFP) tersa-feira (11/02) ne’e Komisariu Jerál Polísia Henrique da Costa hateten Polísia to’o duni iha fatin akontesimentu hodi halo asaun liu husi aviza atu vitima tun husi torre eletrisidade nian tanba fó perigu ba vida, maibé vitima lakoi rona, nune’e kontinua informa ba parte Eletricidade de Timor-Leste (EDTL) maibé parte kompetente dehan ida ne’e perigu.
“Saida maka Polísia halo, ami koordena ho parte EDTL, Autoridade lokal iha parte ne’eba no mós komunidade sira iha area Bidau nian, atu dehan deit katak ita labele asiste ema nia video depois hateten katak Polísia halo eksen deit, tanba ita la haruka ita nia membru atu halo eksen iha ne’eba”, afirma Komandante Jerál PNTL ne’e.
Autoridade másimu instituisaun Seguransa ne’e subliña tan katak ita labele halo uluk konkluzaun ba foto ou video rohan ida hodi julga Polísia nia servisu. Maibé ita halo lao peskiza, los k lae, iha tempu ne’eba ne’e prezenza Polísia nian iha ka lae, sim iha sduni iha ne’eba, Polísia mesak deit ka ou iha tan ema sluk iha ne’eba.
“No buat ida mosu iha pergunta maka ne’e tanba saida maka iha momentu ne’eba EDTL mós iha ne’eba maibé ema la kestiona parte sira ne’e, maibé kestiona liu maka kona-ba laos servisu Polísia ninian ba fali Polísia, ita foti medida maka ne’e, ita hetan informasaun, ita kontaktu ba EDTL atu mai halo servisu maibé EDTL rasik klarifika katak ne’e perigu”, haktuir Autoridade másimu instituisaun Seguransa ne’e.
Komandante Jerál PNTL ne’e apela ba membru sira atu kontinua servisu ho professional, buat ne’ebe maka imi kompetensia atu halo, halo nafatin maibé buat ne’ebe laos imi nia kompetensia, informa mai Komandu ka halo komunikasaun ho parte sira seluk mós.
loading="lazy" />