G-NEWS (DILI) – Kuarta-Feira (08112023) Konsellu Ministru hala’o ona sorumutuk, hodi halo ánaliza kona-ba konflitu ne’ebé akontese iha territóriu balun Timor nian, ne’ebé provoka hosi elementu Grupu Arte Marsiais (GAM).
Liuhosi komunidadu Imprensa, ne’ebé fó sai iha portal Governu, Kuarta-feira (081120230, sita katak, nesesidade ba governu hodi hatuur orden públika, deside tuir lei ne’ebé vígora hela.
“Konsellu Ministrus hala’o sorumutuk iha Palásiu Governu, Dili, no hafoin halo análize ba konflitu sira foin daudaun ne’e iha parte balu territóriu nasionál nian, ne’ebé provoka husi elementu grupu rivál artes marsiais, no haree ba lakon vida ema nian no nesesidade hodi hatuur orden públika, deside, tuir lei ne’ebé vigora hela, hodi halo rekolla informasaun hotu ne’ebé nesesária, hamutuk ho entidade relevante sira hotu”, tuir nota komunikadu imprensa ne’ebé G-News asesu.
Iha nota komunikadu imprensa ne’e mós sita katak, Governu sei foti desizaun iha tenpu badak.
“Ho objetivu atu foti desizaun iha tempu badak kona-ba medida sira ne’ebé sei adota/foti hodi hatuur filafali orden públika”, tuir nota ne’e.
Relasiona ho konflitu ne’ebé akontese iha postu Bobonaro munisípiu Bobonaro, iha Sábadu (04112023) dáder, Primeiru-Ministru Kay Rala Xanana Gusmão, hala’o vizita urjente ba Komandu-Jerál PNTL, atu fó orientasaun ba Komandante-Jerál hodi solusiona insidente ne’ebé akontese iha Postu Bobonaro munisípiu Bobonaro.
“Ha’u halo apelu ba povu tomak, hosi aman, inan, to’o oan sira liu-liu joven sira. joven sira uluk, imi nia aman, inan mate ba rai ida ne’e, agora imi oho malu tanba buat ida ke la folin buat ida”, PM Xanana hato’o lia ne’e.
“Ha’u husu ba Na’i Lulik sira, aban reja netik ba, par fase tiha joven sira nia ulun, tanba ita haree iha uma laran, banin ho mane foun, di’ak malu hela tanba ai-funan kuandu tau iha ne’ebá, hirus malu, tanba ida pertense ida, ida ne’ene”, Primeiru-Ministru ne’e aumeta tán.
Foin lalais ne’e, Komandante Polísia Munisípiu Bobonaro Superintendente Xefe António Maria de Sá, ba G-News, Sexta-feira (03112023) kalan esplika kona-ba kronolójia hosi kazu ne’e.
Superintendente Xefe António Maria de Sá esplika, akontesimentu iha Suku Lourba, alarga ne’ebé taa, hahú hosi membru organizasaun arte marsiais IKS Kera Sakti hasoru membru KORK iha Suku Usikai, postu Zumalai munisípiu Covalima.
“Kazu ne’e hahú hosi dia 2 novembru orseik loron finadu nian, akontese uluk iha Suku Usikai postu administrativu Zumalai munisípiu Covalima. Bainhira ita nia sidadaun ida hosi Lourba ba tau ai-funan iha Suku Usikai, iha ninia banin sira, ne’ebé nia hetan taa hosi nia banin rasik ho ninia rian rasik. Ninia motivu ne’e tanba kazu ne’e hosi organizasaun ne’ebé la hanesan (ne’ebé halai ba GAM). Ida vítima orikalan ne’e hetan taa hosi parte GAM KORK, ida fali suspeitu hosi ninia banin no rian rasik ne’e hosi GAM 80-IKS”, Komandante Polísia Munisípiu Bobonaro ne’e esplika ba G-News, sexta-feira (03112023).
Jornalista : Ekipa G-News
Editór Testu : Amito Qonusere Araújo
loading="lazy" />