G-NEWS (DILI) – Relasiona ho serimónia Ordenasaun Episcopal ba Bispu foun Diocese Baucau Dom. Leandro Maria Alves, ne’ebé sei realiza iha Sexta-Feira aban (21072023) iha Diocese Baucau, Komisaun Organizadora autoriza de’it mídia privadu (MP) rua hanesan GMN-TV no SMSNews, inklui Casa Produsaun (CP) ida hanesan Mercurious Film; House Production) ne’ebé iha direitu antenna atu hala’o kobertura ba serimónian sagradu ne’e.
Tuir nota komunikadu ne’ebé públika iha sítiu Média Diocese Baucau, foin lalais ne’e aviza ona ba Jornalista no mídia sira kona-ba eventu sagradu ida ne’e.
“Ba jornalista sira, Ami husu ita hotu nia kolaborasaun no kumpriensaun, tanba ne’e eventu boot maibé ho karatér sagrada i selebra iha fatin klot tanba ne’e laos jornalista hotu-hotu bele asesu ba fatin Serimónia. Diocese organiza Média prinsipal tolu (GMNTV, SMNews ho Mercurious Film; House Production) atu halo kobertura no iha direitu ba transmisaun direta.
Ami koordena ona ho Konsellu Imprensa atu informa ba Ajensia Média hotu-hotu ne’ebé iha intensaun ka interesse atu halo kobertura, bele kumpriende asuntu ne’e hodi la prejudika Serimonia Sagrada ne’e”, haktuir iha sítiu komunikasaun Diocese nian foin lalais ne’e.
“Ami prepara spot tolu ba ajensia ne’ebe C.O indika ona. Jornalista seluk ne’ebé laiha lisensa asesu, la permite atu halo movimentu durante selebrasaun. Bele halo dokumentasaun hosi ida-idak nia fatin ou share link hosi ajensia ofisial sira”, haktuir tán.
Maske la autoriza atu mídia sira halo transmisaun direta ka halo kobertura, maibé Komisaun Organizadora kontinua aviza ba mídia hotu-hotu relay hosi mídia ne’ebé hetan autorizasaun ba transmisaun eventu sagradu ne’e.
Antes ne’e, mídia balun protesta makaas tanba la hetan espasu atu halo kobertura. Diretór Mídia INDEPENDENTE José Sarito Amaral, liuhosi postajen iha ninia pájina Facebook segunda-feira (17072023) dehan, nota komunikadu ne’ebé Komisaun Organizadora Diocese Baucau fó sai hanesan notísia triste hasoru mídia Timor Leste
“Notas ne’e tristeza boot hasoru media Timor Leste. Konvite ofisial ba deit gmn tv, smnews ho marquorios film. Afinal Amu Sira mos la hatene servisu media nian, pior Liu Mak konvite ba media Sira Liu fali husi konsellu Imprensa Mak distribui, hheheheee”, haktuir José Sarito Amaral.
Independente tv halo ona aproximasaun ho organizador Sira iha dioseze Baukau Fulan rua antes ona, maibe rejultadu sai Mai oin seluk, la konsidera. Obrigadu ba komisaun Sira Nia servisu”, nota ofisial hosi Diretór Mídia INDEPENDENTE.
Iha parte seluk, Senior Jornalista ida Lirio da Fonseca, mós hala’o postajen iha ninia pájina Facebook hodi lamenta kona-ba nota komunikadu hosi Komisaun Orgaizadora Serimónia Ordenasaun Episcopal Dom Leandro Maria Alves.
“Ajensia Nutisia iha Timor Leste ne idq deit, ne mak ajensia Nutisia TATOLI, Aj3nsia ida atu ba kopy fali PH ida nia live ne diak ga (…Sticker hamnasa…) Ne so iha TIMOR LESTE ulun tun ain sae”, haktuir iha postajen Pájina Facebook Lirio da Fonseca, foin lalais ne’e.
Hatan ba ne’e, Prezidente Konsellu Imprensa Timor Leste Otelio Ote, halo klarifikasaun kona-ba Kobertura Mídia ba Serimónia Misa Ordenasaun Episkopal Dom Leandro Maria Alves, Bispo Dioseze Baucau.
“Husu ba mídia sira atu halo aprosimasaun rasik ba komisaun organizadora hodi hetan kartaun asesu ba kobertura iha fatin ne’ebá. Konsellu Imprensa akompaña de’it oinsa kobertura ne’e se lao, hanesan bain-bain Konsellu Imprensa nia kna’ar mak halo de’it monitorizasaun ba produtu Jornalistiku sira ne’ebé meius komunikasaun sosiál públika iha terrenu, rezultadu hosi atividade jurnalistiku hosi jornalista sira”, Otelio Ote haktuir.
Prezidente Konsellu Imprensa ne’e mós husu ba komunidade mídia katak, Jornalista, mídia no públiku sei sai bainaka iha eventu ida ne’e,hodi buka fatin atu ase ba fatin refere.
Alende ne’e, Konsellu Imprensa mós husu ba Komisaun Organizadora atu kontinua fasilita meisu komunikasaun social sira atu asesu fatin, hodi halo kobertura ba eventu importante ida ne’e.
Tuir nota komunikadu ne’ebé G-News asesu katak, Xefe Estadu promote ba komisaun organizadora ba ordenasaun episcopal nian katak, sei partisipa ordenasaun ne’e, no komisaun organizadora mós husu ba Xefe Estadu atu hato’o diskursu Estadu nian depois bensaun final.
Entertantu, oras ne’e dadauk, Komisaun Organizadora no sarani sira hosi Diocese Baucau hahú halo preparasaun másimu ba eventu sagradu ne’e, nune’e bele realiza serimónia ordenasaun episcopal ba Dom. Leandro Maria Alves, lao ho susesu.
Jornalista : Ekipa G-News
Editór Testu : Amito Qonusere Araújo
loading="lazy" />