G—NEWS (BAUCAU) — Komunidade husi aldeia Ague, suku Seiçal postu administrativu Baucau vila munisipiu Baucau, husu autoridade kompetente hanesan Bee Timor-Leste atu rezolve problema bee-moos tanba dadaun ne’e sira la asesu.
Rezidente aldeia Ague, Domingos Savio Freitas haktuir, iha tinan 2017 programa nasional dezenvolvimentu suku (PNDS) halo ona kanalizasaun bee moos ba sira maibé atuál torneira públiku kada bairu bee la iha.
Nia informa, atu responde ba nesesidade kada loron, komunidade ne’ebé iha finanseiru bolu empreza balun tula bee husi Baucau vila hafoin sosa ho tanki ida, dolar amerikanu rua nolu resin lima, no balun kuru bee iha mota, la’o distánsia kilometru ida resin, tanba ne’e husu ba parte kompetente atu buka solusaun ba problema bee-moos ne’ebé sira imfrenta.
“PNDS dada tiha mai bairu rua mak hetan maibé la to’o tinan fulan lima de’it bee ne’e la iha ami komunidade Ague halo sakrifisiu tenki kuru iha mota maibé senti ladun satisfas entaun ida-idak halo bak bolu tenki mai ense kada tanki ida primeiru(folin)45 depois tenki aumenta diminui fila-fali 35 too 25 para, hakarak husu ukun na’in sira pelumenus hanoin netik ami povu aldeia Ague, buka mekanizmu oinsá dada bee mai ami asesu,” reprezentante komunidade Ague rekomenda.
Kordenadora Servisu BTL Munisipiu Baucau Adrianda Belo da Roza hateten, sei koordena servisu ho PNDS karik iha orsamentu manutesaun programa nasionál dezenvolvimentu suku Seiçal bele aloka hodi halo manutesaun nune’e bele fornese bee ba komunidade.
Aleinde ne’e autoridade lokal bele hato’o pedidu ba BTL munisípiu Baucau hodi ekamiña ba diresaun nasionál hodi buka solusaun.
“Sira nia lina existe iha somente avaria, sira nia projeitu hala’o husi PNDS ne’ebé ita sei halo koordenasaun ho PNDS sira nia orsamentu manutensaun bele aloka ba ne’ebá ka lae, tanba BTL sei foku ba area urbanas munisipiu no postu urbana sira bainhira ida ne’e remata ita bele hare asuntu bee rurál sira, lataka dalan sira bele halo pedidu mai BTL ami hatutan ba nasionál,” dehan Adriana.
Komunidade aldeia Ague Suku Seiçal, uma-kain hamutuk atus ida ualu no populasaun atus lima resin.
loading="lazy" />