Komunidade Akrema-Ataúro simu apoiu sosiál hosi PR Ramos-Horta

G-NEWS (ATAÚRO) — Prezidente Repúblika, J. Ramos-Horta kontinua fó apoiu sosiál ba kmunidade vulnerável inklui oferese materiÁl konstrusaun ba uma nian iha  bairro Akrema, Aldeia Uaru-ana, Suku Biqueli, Munisípiu Ataúro, iha Sexta ne’e.

Tuir Assesór nu’udár servisu Sosiedade Sivíl no Assuntu Sosiál Prezidénsia Repúblika ( SSAS-PR), Quintiliano Moníz Carvalho, haktuir, “Ohin ita oferese tuir orientasaun no aprovasaun hosi Prezidente Repúblika, José Ramos-Horta hodi oferese materiál konstrusaun ba família ida hosi Apa Fernando Belo no oferese mos nessidade bázika ba família vulnerável uma-kain 30 inklui ropa ba labarik no Jacket salva vida iha tasi-laran ba peskadór sira,” Dehan Nia hafoin distribui Sasan.

Família Fernando Belo hetan apoiu materiál konstrusaun hosi Xefe Estadu Horta, tanba sidadaun Fernando ho tinan 60-resin ne’e, husu tulun liuhosi Assesór SSAS-PR atu Prezidente Repúblika José Ramos-Horta bele hadia nia uma, ne’ebé, ho kondisaun grave, liu-liu iha tempu udan. Tanba iha família ne’e, iha mos bebe ho idade menus hosi tinan tolu. Hafoin hato’o ba Xefe Estadu, hetan kedas aprovasaun ba apoiu ne’ebé husu.

Reprezentante autoridade lokál Suku Biqueli, Nadab Correia, agradese ba tulun Xefe Estadu Horta tambá bele tulun nia populasaun.

“Komunidade ne’e infrenta duni uma-at, terus liu bainhira tempu udan. Nune’e prezensa hosi Prezidénsia Repúblika nian, ami kontente no agradese ho tulun ne’ebé iha ba ami nia komunidade”. Nadab Correia.

Bairro Akrema ho totál populasaun 162, ne’ebé lokaliza iha área potensiadu ba turízmu, maibé área ida izoladu, la assesu ba bee-moos, eletrisidade inklui telekomunikasaun.

Entretantu, ajudu ne’ebé Prezidente Repúblika oferese liuhosi Servisu SSAS-PR mak, ekipamentu konstrusaun uma ba família vulnerável mak hanesan simenti 50 sakas, kalém 80, Ai ba halo uma hamutuk 30, Rai-henek iha kamioneta ida, inklui oferese ai-han báziku hanesan fós no mina ba tein ba uma-kain vulnerável hamutuk 30, no ropa ba labarik no ‘’Jacket salva vida’’ iha tasi nian, hamutuk 50 ba peskadór sira.

Editór Testu  : Amito Qonusere Araújo