G-NEWS (DILI) – Atu fó Onra no respeita ba As’wain Falintil sira mak grupu Juventude balun kria Kopa Falintil tinan 2023 hodi komemora Loron Falintil ba dala-48 tinan 2023.
Atu kamemora loron FALINTIL ida-ne’e hodi hatudu sentidu respeitu ba as’wain Falintil sira, tanba sira halo buat barak ona ba Rai ida-ne’e, liuhosi sira-nia dedikasaun no sakrifisiu hotu ne’ebé sira halo durante periodu funu tinan 24.
Nu’udar Timor-oan, iha obrigasaun atu kria amizade no paz entre Timor oan sira hotu liuhosi modalidade desportu. Tanba liuhosi jogu ka Torneu ne’ebé mak Ami halo ne’e konsege halo ami sai kuinese malu diak liutan.
Prezidente Komisaun Organizadora Diogo Ferreira, Domingu (202082023) ba G-News hateten, torneu Falintil ne’e nu’udar inisiativa hosi pesoal sira ne’ebé bain-bain treina bola, maibé tanba ekipa seluk interese, ikus mai hari’i ekipa hodi hala’o eventu ida ne’e.
“Molok Torneu ne’e realiza, Ami hosi ajénsia balun, instituisaun estadu balun bolu malu hamutuk hodi realiza jogu Amigavél Iha Jogu Salaun (Futsal). Depois, Ami sente gosta fali halimar iha Kampu boot(11 sides) . Entaun, Ami konvida malu ba joga fali iha Kampu DIT, FFTL nian. Ami-nia jogu Amigavél entre ekipa U40 no ajensia sira kontinúa la’o ho di’ak”, Diogo esplika.
“Ikus mak ha’u rasiik mak inisia hanoin ida atu realiza jogu Torneu ida iha Kampu Gleno Ermera ho Tema “Em Memória de Saudozu Nino Konis Santana hodi hametin Fraternidade Umana“. Iha mini Torneu refere partisipa hosi ekipa 4 mak kompostu hosi FC Kosar, UNTL, U40 Café, no Mua Cau United” Nia aumenta tán.
Durante Torneu refere iha Gleno, jogadór sira hosi ekipa 4 ne’e hatudu jogu ne’ebé mak nakonu tebés ho amizade tanba motiva liutan hodi halo kontaktu ho responsavel u40 UNTL Gil Da Conceição atu tuur hamutuk, hodi kontribúi hanoin balun, no konvida ekipa U40 sira seluk atu realiza Kopa Falintil ba tinan ida-ne’e hanesan FC Kosar, FC Mua Cau United, U40 UNTL, Komunidade U40, Global United no Uagima.
“Durante Ami hala’o Torneu ida-ne’e, Ami hetan dezafiu balun. Dezafiu hirak-ne’ebé mak Ami hasoru durante ami-nia atividade ne’e la’o mak laiha ema neebe koiñese di’ak kona-ba jogu futeból hodi bele apoia Ami iha parte arbitrazen. Tanba dalaruma Ami entre jogadór sira mak hili malu hodi sai arbitu ba jogu ne’ebé mak Ami hala’o. Entaun, buat sira ne’e bele fó impaktu ba Ami hodi hamosu deskontente no la satisfas ba desizaun balun ne’ebé mak arbitu hola. Dezafiu seluk tan mak, Ami durante ne’e halo proposta balun hodi hetan patronizadór balun maibé infelizmente laiha resposta pozitivu ba Ami-nia proposta balun”.
Maske iha defikuldade ne’ebé sira enfrenta, maibé iha esperansa ba oin sei halo di’ak liutan no hakarak kontinua realiza jogu Amigavél hirak hanesan ne’e hodi fó nafatin onra ba as’wain sira seluk liuhosi modalidade futeból ba iha munisípiu hotu.
Jornalista : Ekipa G-News
Editór Testu : Amito Qonusere Araújo
loading="lazy" />