Alarico : Traballadór Bá Servisu La’ós de’it Buka Osan

Jornalísta : Amar Belo //

G-RTV.com (Dili) : Sekretária Estadu Formasaun Professionál No Empregu (SEFOPE) Liu Husi Diresaun Nasionál Empregu Exterior Realiza Serimónia Despedida No Assina Deklarasaun Ho Família Traballadór Na’in 77 Ne’ebé Atu Ba Serbisu Iha Australia Iha Fulan  Ne’e.

Iha diskursu, SEFOPE, Alarico de Rosario husu bá inan-aman sira atu husik sira ba serbisu la’ós de’it buka osan maibé ba aprende atu bele mai hanorin inan-aman sira iha timor leste.

“Ha’u promete ba sira atu ba servisu iha Australia atu aprende hafoin osan, aprende atu halo saida tambá iha timor leste ita hotu hatene katak ita halo toos ho kuda manual maibé iha Austrália halo toos kuda ho modernu tamba ne’e mak kualidade la hanesan, iha timor ema ida halo toos lato’o hektares ida maibé iha Australia ema ida halo toos too hektares 20 ka 30 tamba ne’e mak hau ejize ha’u  nia oan ka alin sira atu ba  aprende, toos iha ne’ebá halo modelu oinsa  hodi nune’e bele mai hanorin inan-aman sira dehan halo toos lolos no modelu mak ida ne’e, nemak importante,” Hateten Alarico iha salaun sentru formasaun ETDA, Aimutin (Dili) Tersa-Feira, 31/05/2022.

Nia husu ho hakraik-an ba traballadór sira ne’ebé mak naran iha ona sistema servisu tuir regras atu nune’e bele fo konfiansa nafatin ba timor leste hodi nune’e haruka nafatin sira ne’ebé hein hela prossesu.

“Sira ne’ebé mak naran iha sistema labele ultra passa sistema, serbisu tuir nia regras para imi fila ami no inan-aman mos kontente tamba ema barak mak seidauk ba, sei imi halo taka dalan ba sira, loron ida ema lakohi simu timor-oan halo nusa los tamba ne’e mak ha’u husu ho hakraik-an ba ha’u nia alin sira, karik hadomi timor, inan-aman no ami labele halai sai husi sistema, no nia apela ba sira atu servisu hare malu hanesan feto ho na’an.” Tenik nia.

Totál trabalhadór ne’ebé sei arranka bá Australia, servisu hamutuk na’in 77 kompostu feto hamutuk na’in haat nolu resin ualu (48) no mane hamutuk nain rua nolu resin sia (29) ne’ebé servisu ho durasaun kontratu tinan  tolu ba ema nain sanulu (10) no ba serbisu ho durasaun kontratu fulan sia ba ema nain neen nolu resin hitu (67).

(REMATA)

Editór : Arménio.