G-NEWS (DILI) — Eis Primeiru-Ministru, atual Sekretáriu-Jerál Frente Revolusionário de Timor Leste Independente (FRETILIN) Marí Alkatiri hateten, durante ne’e governu la iha polítika enkuadramentu legal ba joven sira.
Marí Alkatiri ko’alia lia ne’e, iha semináriu nasionál kona-ba oinsá aplika prinsipius no valores luta nian hodi hakotu kiak no hatur justisa sosial, iha Àmbitu, Komemorasaun, Sinquentenariu ASDT/ FRETILIN 20 de maiu 1974- 20 de maiu 2024, salaun, CNE Caikoli Dili, 15112025.
Marí Alkatiri esplika, ikus-ikus nia parte tun ona ba terrenu hodi haree kondisaun povu nian. Husi ne’e mak nia foin sente katak, joven maiória lakon ona esperansa, ikus mai tenke ba buka moris iha rai-liur, liu husi polítika governu nian ne’ebé la’o hela durante ne’e.
“Ha’u foin sente katak, Joven komesa lakon esperansa tanba ita haluhan katak joven sira ne’e mak sei garante povu ba futuru nasaun nian”, Mari Alkatiri ko’alia kona-ba ne’e.
Tuir Sekretáriu-Jerál FRETILIN ne’e katak, durante ne’e la iha polítika espesífiku ida kona-ba formasaun karakter ba joven sira la iha.
“Uluk ita lori povu, povu fó fiar mai ita, tanba hakarak liberta rai ida ne’e. iha politika rum aba enkunadramentu legal ba joven sira, la iha. Formasaun karakter ba joven sira la iha”.
“Sa joven mak ita bele haburas sira nia esperansa bainhira iha prosesu dezenvolvimentu ita la fó valor ba sira nia enkuadramentu legal”, Marí Alkatiri esplika.
Marí Alkatiri dehan tán katak, buat sira ne’e la fó esperansa, entaun joven sira ba buka vida iha rai seluk. Maibé nia la kontra joven sira ba buka moris, maibé governu mak promove sira ba rai-liur. Maski nune’e, Marí Alkatiri rekoñese katak, liu husi ba buka servisu iha rai-liur bele fó apoiu ba moris di’ak família nian.
“Ha’u mos dehan, ba ha’u nia maluk sira husi jerasaun 74/75, se ita la muda ita nia postura lalais, se joven sei nafatin marzinalizadu, hakarak hasai opozisaun iha Parlamentu, aban bainrua joven sei mai luron”, Sekretáriu-Jerál FRETILIN Marí Alkatiri, ko’alia iha semináriu ne’e.
Tanba ne’e, Marí Alkatiri husu ba públiku atu lalika fo sala ba joven sira, maibé sala ne’e mai husi jerasaun antigun sira, tanba tuir Marí katak, povu fó ona fiar atu ukun.
Editór Testu: Amito Qonusere Araújo
loading="lazy" />