G—NEWS (BAUCAU) — Provincial Salesianu Timor-Leste, Pe. Anacleto Pires, SDB. hamutuk ho família salesiana no devoto sira selebra missa solene loron Maria Auxiliadora dos Cristãos nian, iha Santuáriu Fatumaca, iha loron 24 fulan-Maiu tinan 2025.
“Ohin ita hamutuk iha ne’e nu’udar família salesiana ne’ebé mak iha devosaun boot ba Maria Auxiliadora. Ita iha domin ba Maria: primeiru, tanba ita sarani fiar na’in. Segundu, tanba ita Dom Bosco nia oan sira ne’ebé promove devosaun ba Nain Feto Maria Auxiliadora. Ohin ita mai hamutuk; ita agradece ba Maria ninia tulun ba ita ida-idak, ba ita nia família, ba ita nia sosiedade no liu-liu ba ita hotu família salesiana”. Dehan Pe. Anacleto iha homilia.
Provincial ne’e mos husu ba família salesiana atu habelar devosaun ba Nain Feto Maria Auxiliadora no devosaun ba Jesus iha Santíssimo Sakramentu, liu-hosi: hadomi hanesan Maria hadomi, moris hanesan Maria moris, mehi hanesan Maria mehi, sente hanesan Maria sente no hamnasa hanesan Maria hamnasa.
Atu moris tuir Maria moris ne’e nu’udar dezafiu ida ne’ebé sarani sira presiza hala’o. Tanba ne’e mak Provisial ne’e hateten; “atu moris hanesan Maria moris ne’e presiza ita ida-idak halo reflesaun. Ne’e duni, iha primeiru dia novena ba Maria Auxiliadora ita reflete ona kona-ba Maria nia umildade no fiar”.
Pe. Anacleto explika, “bainhira Anju fó hatene ba Maria kona-ba konvite atu sai Maromak nia Inan, fofoun Maria la komprende maibé ikus mai nia hateten de’it, ata oan mak ne’e halo tuir ita liafuan ba. Maria hatudu nia umildade, katak iha Maromak nia futar-oin, nia ema ki’ik no la soi”.
“Ata oan mak ne’e halo tuir ita liafuan ba; liafuan ne’e mos atu dehan, Maria ho fiar metin entrega ninia-an tomak ba Maromak, katak ‘ha’u mak ne’e halo tuir de’it’. Maske hasoru desafio no problema, Maria simu ho fuan no laran tomak, ho esperansa no fiar metin”. Hateten Pe. Anacleto
Padre selebrante ne’e repete liafuan Santu Padre Papa Leão XIV nian ba jovem sira atu keta tauk maibé aten-brani simu konvite hosi Maromak hodi halo di’ak hanesan Maria ne’ebé ho haraik-an no fiar, simu konvite Maromak nian hosi Anjo São Gabriel, atu Maria sai Jesus nia Inan no umanidade hotu nia Inan.
Molok selebra eukaristia loro-kraik nian; kleru, religioso/a, grupo kategorial salesianu nian, autoridade, sarani devoto no estudante sira hala’o prosisaun hosi Gruta to’o iha Kapela Santuário Maria Auxiliadora Fatumaca.
loading="lazy" />