G-NEWS (RAEOA) — Populasaun Oecusse-Ambeno dala ida tán hatudu espíritu patriotizmu ne’ebé aas hodi komemora loron Proklamasaun Independénsia Timor-Leste nian iha loron 28 fulan-Novembru, ba dala-49.
Selebrasaun ne’ebé moris ne’e nu’udar evidénsia klaru katak espíritu nasionál moris nafatin iha sosiedade, maski iha dezafiu oioin iha nia implementasaun.
Júlio Neno nu’udar komunidade husi Sub-Rejional Oesilo, ko’alia ba G-NEWS, iha kampu serimónia Lifau hateten katak, partisipasaun sidadaun nian ne’e estraordináriu. “Ami sira hosi suku no aldeia oioin hamutuk hodi partisipa atividade ida-ne’e sai susesu. “Ida ne’e hanesan momentu ida ne’ebé iha valór tebes hodi hanoin hikas nasaun nia luta”, nia hatete.
Maibé, la’ós buat hotu la’o ho di’ak. Markus Elo, komunidade fó sai katak, iha obstákulu tékniku, inklui transporte no distribuisaun ekipamentu.
“Oecusse iha ninia dezafiu jeográfiku rasik, tanba dook, kondisaun estrada no buat seluk tán, maibé la signifika atu hamate ema hotu nia espiritu nasionalizmu. “Maibé tanba kooperasaun hosi parte hotu-hotu, ami konsege ultrapasa ida-ne’e”, nia hatete.
Iha parte seluk, Julião de Jesus nu’udar joven ida ne’ebé involve an iha ekipa koru, espresa ninia orgullu ba partisipasaun husi jerasaun foun sira.
“Ami hananu inu nasionál ho entuziazmu maka’as. “Problema balun ne’ebé akontese, maibé ida-ne’e la hamenus ami nia respeitu ba momentu istóriku ida-ne’e,” nia hatete ho matan ne’ebé nabilan.
Armindo Filomeno Ximenes, sidadaun ida husi Dili mak mai partisipa loron nasionál iha Ambeno-Oecusse subliña, importánsia atu hanoin hikas luta ba ukun rasik-an.
“Eventu ne’e hanesan lembransa ida katak independénsia ne’ebé ita goza ohin loron la mai ho fasil. “Ami hein katak jerasaun foun sira komprende valór sira ne’e no kontinua luta tuir sira nia dalan rasik”, nia subliña.
Mesmu iha obstákulu ki’ik sira, maibé entusiazmu husi povu Oecusse-Ambeno nu’udar prova momoos katak espíritu proklamasaun nian nunka mohu.
Selebrasaun ne’e la’ós de’it hanesan símbolu ba memória pasadu nian, maibé mós hanesan lembransa ida kona-ba responsabilidade ne’ebé fahe hodi harii futuru ne’ebé di’ak liu.
Editor Testu: Amito Qonusere Araújo
loading="lazy" />