G-NEWS (DILI) – Santu Padre Francisco sei enkontru espesiál ho polítiku no ukun na’in sira Timor nian, bainhira vizita Timor Leste durante loron tolu, hahú hosi loron 9 to’o loron 11 fulan-Setembru tinan 2024.
Bispu Metropolitana Arquidiocese Dili Dom Virgilio Cardeal do Carmo da Silva SDB, liuhosi konferénsia Imprensa, sesta-feira (12042024) dehan, Santu Padre sei hasoru malu ho Xefe Estadu José Ramos Horta, no enkontru ho ukun na’in sira.
Alende ne’e, Santu Padre Francisco mós sei iha enkontru espesiál ho reprejentante joven sira, inklui grupu ema ho defisiensia, ne’ebé Igreja Katólika Timor nian identifika ona.
Relasiona ho preparasaun, Dom Virgilio Cardeal do Carmo da Silva dehan, parte Igreja Katólika responsabiliza atividade sira ne’ebé iha ligasaun ho Igreja nian, hanesan dalan ne’ebé Santu Padre liu, no fatin atu selebra misa Eukaristia.
“Kona-ba preparasaun lojistika, iha governu ninia liman. Parte igreja haree liu ida ne’ebé kabe igreja nia knar. Hahú hosi fatin ne’ebé Amu Papa sei liu, enkontru iha Katedral, Misa iha Tasi Tolu”, Dom Virgilio Cardeal do Carmo da Silva esplika.
Tuir Dom Virgilio Cardeal, Santu Padre Francisco sei selebra misa la liu oras rua, tanba kestaun ba kondisaun Santu Padre nian.
Igreja Katólika Timor nian, fahe ona servisu ba kada Diocese, hodi responsabiliza ba vizita Santu Padre nian, liu-liu mós fó responsabilidade ba enkaregada Vigariu Jerál tolu, oinsá prepara matéria, hodi tulun sarani sira kona-ba importansia Amu papa nia vizita mai Timor.
Entertantu, Santu Padre mós sei hala’o enkontru ho Padre no Madre sira.
Editór Testu: Amito Qonusere Araújo
loading="lazy" />