G-NEWS (LORÉ-LAUTÉM) – Beleza natural hahú lakon iha área Parke Nasionál Nino Conis Santana (PNNCS) parte Loré-I, tanba afeita hosi mudansa klimátika ne’ebé akontese tinan hirak ba, no menus kontrolu hosi governu ba espesie flora no fauna ne’ebé ho valor ekonómiku atu subtitui fundu petrolíferu.
Área PNNCS iha Lautem kompostu husi postu Loré, Lospalos, Tutuala no Iliomar. Estadu foti área ne’e sai nasional tanba iha rekursu natural, ai-laran tuan, animal fuik rai maran no tasi, fatin ssagradu kultural no seluk-tán.
Media tour ne’ebé organiza hosi Assosiasaun Jornalista Timor-Leste (AJTL) ho Oxfam iha Timor-Leste mobiliza Jornalista hosi instituisaun Midia-17, halo kobertura espesífiku ba Suku Loré-I ho luan areal 133.77 km2, kona-ba asaun ba Justisa Klimátika, liga ho moris komunidade ne’ebá.
Mudansa Klimátika tinan hirak liuba iha PNNCS Loré afeita ba ai-horis balun ne’ebé ho valor boot ba ekonomia Aikameli, ai protejidu no balada fuik barak mak komesa menus, maibe to’o ohin loron Governu seidauk tau atensaun sériu atu dezenvolve ho di’ak.
Foho-Kablaki sei nakfilak ba Parke Nasionál Kay Rala Xanana Gusmão
Tékniku Ministériu Agrikultura, Diresaun Jerál Peskas no Departementu Konservasaun Mariña Jóse Monteiro hateten, Tasi ibun parte Loré, ba Aikameli iha area Ahiru ne’ebé potensiál tebes iha Lore-I hanesan Ai-kameli ne’ebé barak tebes ho natural desde beiala to’o agora maibé laiha atensaun hosi governu.
“Hosi tempu beiala sira nian to’o ohin loron ita ukun an, Governu liu husi Sekretáriadu Estadu Floresta no mós diresaun Floresta la tau matan entaun ai-hirak ne’e komesa mate ona, ai barak mak mate tanba la iha atensaun sériu hosi primeiru governu até Governu da-sia agora,” dehan tekniku José Monteiro, akompaña Jornalista Observa Aikameli iha Tasi ibun Lore 1, Sesta-feira (31/05/2024).
Nia afirma, ai-kameli ne’e moris ho orijinál ka naturál la’os ema mak kuda, iha teoria Floresta esplika, distansia hosi tasi ibun 500 metru bá laran ne’ebé tasi is sei to’o ne’ebá. Maibé realidade iha Aikameli moris metru ida hosi tasi ibun bá laran.
“Tan ne’e mak espesiál teb-tebes ho hanoin katak, liuhosi informasaun ida ne’e ami sujere bá média atu Públika nune’e Governu da-sia bele fó atensaun hodi proteje liu husi arame tarak ka atu nune’e Aikameli hirak ne’e mantein nafatin para bá oin ita nia oan ne’ebé mak estudu iha universidade karik sira halo peskiza to’o iha ne’e. Mundiálmente Tasi iha mundu hotu aikameli sira ne’e labele moris so kuda mais ne’e tenke dook husi distansia 500, maibé iha Lore moris to’o iha tasi ibun,” nia dehan.
Nune’e sujere bá governu da-sia oinsá rona no tau atensaun ba área Aikameli iha Parke Nasional Espesiál Lore-I tanba realidade la’os ema mak kuda.
“Ita boot sira haree katak ohin loron tinan rua tutuir malu ne’e Aikameli barak mak mate hotu tanba Mudansa Klimatika, bailoron naruk ne’ebé mak afeita demais laiha ai balun ne’ebé mak sai hanesan mahon bá sira entaun aikameli kuaze mate hotu,” nia akresenta.
Aikameli dadaun isin ona, seguransa Guarda Floresta mínimu tebes. Ema na’in tolu de’it labele kontrola hosi aldeia Tchai tama to’o tasi ibun Lore. Iha Informasaun balu ema nauk Aikameli kuaze 10 ka 20 resin ne’ebé ninia diameter boot no isin ona, maibé la iha Guarda Floresta. Aikameli parte hosi riku soin Timor nian, maibé Governu la tau matan entaun oinsá bele moris ho dignu. Aikameli mak haree ho matan, ema deskoñesidu tesi no faan subar.
“Foin semana liu ba ita nia Guarda Floresta iha leten neeba besik Lospalos sira konsege kaer balu-balu, maibé ida ne’e la sufisiente, tan ne’e ha’u sujere no rekomenda bá Ministériu Agrikultura liu husi Sekretáriu Estadu Floresta atu aumenta tán korpu Guarda Floresta,” nia dehan.
Husu ba Sekretáriu Estadu Floresta no Diresaun Floresta atu dada haleu rede bá Aikameli iha fatin parte tasi ibun Loré, tanba fatin ida ne’e potensiál tebes no espesífiku iha mundu. Aikameli presiza konserva didi’ak no importante tanba iha nasaun seluk la iha, só iha Timor-Leste parte Lore-I ne’ebé moris iha tasi ibun. Aleinde ne’e husu haleu ho arame farpagu no tenke asegura seguransa másimu, nune’e bele asegura no proteje espesie ka volume aikameli labele lakon.
Antes tinan 2018, Aikameli matak lo’os hanesan Ai-laran fuik, maibé dezde tinan 2019 to’o agora. barak mak mate ona. Iha área Lore tomak, kuaze hektares 200 liu mak iha potensiá Aikameli.
“Husi Aldeia Vailana kuaze Aikameli tomak tama to’o iha Aldeia Tchai ho Titilari nian ne’e moris ho naturál la’os ema mak kuda ne’e, desde ita nia beiala sira to’o ohin loron la’os ema mak kuda iha ne’e ha’u hanoin ita labele konta hun hira maibé iha ne’e rihun. Area Aikameli boot liu iha Timor ne’e ha’u bele hatete katak iha Lospalos Espesiál iha Lore no mós husi Com nian tama to’o Tutuala nian, loloos ne’e governu iha obrigasaun atu tau matan tan ne’e ita bele dehan hanesan Icon Timor nian ne’ebé moris orijinál la’os ema mak kuda ka muda husi rai seluk mai kuda iha ne’e,” tenik nia.
Korpu Guarda Floresta Mario da Costa hatete, ailaran PNNCS iha área Loré sei virjen ka orijen, nune’e nia parte tenke kontrolu másimu maske ema na’in tolu de’it, maibé halo órariu hodi halo patrollamentu no monitoriza iha dalan Loré ba Lospalos atu bele asegura rikusoin.
“Iha área Parke Nasionál Nino Conis Santana mak ai laran sei orijen, biodiversidade animal fuik iha oin-oin hanesan rusa fuik, laku, meda, lekirauk no grupu manu fuik hanesan manu pombu, niki, kakatua, manu kakuk no mós grupu samea ne’ebé ejiste antes ita iha. Nu’udar korpu guarda Floresta, ami iha misaun ida tenke kontrolu másimu maske ami na’in tolu de’it maibe ami halo órariu hodi hala’o patrollamentu no monitoriza loron-loron iha dalan Lore ba Lospalos atu bele asegura rikusoin no atividade ilegal ba merkadu no ba fatin seluk,” dehan Mario iha nia Rezidensia.
Iha loron 25 fulan-Maiu tinan ne’e, guarda florestal iha Loré, kaptura ema ida iha dalan Trans besik Lospalos, tenta lori ai-kameli ho kilograma 70 ka 80 atu ba faan iha merkadu Lospalos, no prosesa ona tuir dalan legál.
Komunidade sira iha Loré menus ona halo toos iha Zona inti, Zona trapaun no Zona tranzisaun. Zona tolu ne’e hetan kotrolu husi korpu guarda floresta.
Zona inti mak ai laran orijen ne’ebé husi beiala sira to’o agora nunka halo toos no natar iha ne’ebá. Zona trapaun mak ai laran ne’ebé depois Portugal mai, komunidade halo toos, maibé Indonézia okupa, durante funu laran, la halo toos no natar, entaun to’o agora ai hun boot barak fali sai ai laran ona. Zona tranzisaun mak depois ukun an komunidade halo toos no natar maibé agora koñesementu agrikultura menus, entaun zona ne’e ai komesa moris fali iha Zona trapaun ona.
Komunidade sira la halo toos no natar ne’e obstakulu moris tanba la hatene oinsa bele prodús hare no batar, afinal iha PNNCS ne’e rai luan no iha mos rai produtivu maibé komunidade sira buka di’ak de’it, komesa menus ona koñesementu halo toos no natar, estadu mós husik de’it sei influensia ba nasaun nia dezenvolvimentu.
“Mudansa Klimátika iha duni maibé Parke ne’e iha parte mariña iha tasi ibun lori Ai-parapa sira balun mate, ita hare’e mós iha Laivai mós barak mak mate kauza impaktu klimátika no balun mate tanba kauza sosiedade balun seidauk iha koñesementu ambientál, soe plastiku arbiru entaun mota lori ba tasi laloran baku ba ai-parapa nia oan mate labele hotu entaun agora ai-horis ne’e menus,” nia dehan.
Animal fuik sira iha Parque ne’e la naran mate maibé komunidade mak kasa ilegal barak liu husik de’it mak impaktu boot tanba estadu seidauk iha lei seguransa ba kilat manu no material kasa nian seluk, entaun komunidade uza kontinua kasa tanba guarda na’in tolu de’it labele kontrolu hotu iha Parke ne’e. Maske nune’e halo esforsu maibe labele kombate atividade ilegal ne’e totál tanba ho kondisaun mínimu.
“Komunidade balun sei uza kilat manu tanba guarda floresta iha Lore nain 3 deit, halo patrollamentu iha sorin kasador mosu iha parte karuk entaun nafatin iha atividade ilegal ne’e no durante ne’e ami ho esforsu ne’ebe iha konsege preende kilat manu 4 no mos meda hamutuk sanulu resin, niki no manu fuik ne’ebe sira kasa,” nia salienta.
Maske korpu guarda floresta iha Loré na’in-3 de’it maibé ne’e la’os obstakulu ida. Sira esforsu nafatin sensibiliza, monitoriza no patrolla hodi kontrolu sirkulasaun atividade ilegal iha Lore.
……….sei kontinua fali edisaun-II……….
Jornalista : Martinho Belo
Editór Testu : Amito Qonusere Araújo
loading="lazy" />