G—NEWS (DILI) — Parlamentu Nasionál liu husi reuniaun plenária extraordinária, iha loron 9 fulan maiu tinan 2025, realiza sesaun solene ba homenajen póstuma Ex-Deputadu, Ernesto Fernandes “DUDU” ne’ebé hakotu iis iha Hospital Nasionál Guido Valadares, iha loron 6 fulan maiu tinan 2025, ho idade 79.
Ho ida ne’e, plenáriu hato’o sentimentu Profunda Kondolénsia liu husi aprovasaun ba Votu Pezar nú 7/2025, Pezar ba Falesimentu Ex-Deputadu, ho votus unanimidade a favor 51 kontra 0 no abstensaun 0.
Ernesto Dudu, hala’o papél xave iha rezisténsia armada hasoru okupasaun Indonézia, momentu neba nu’udar komandante FALINTIL no lidera gerileiru sira iha rejiaun IV-Ermera nian.
Hodi rekoñese nia kontribuisaun ba libertasaun nasionál, Ernesto Dudu hetan medalla Orden Timor-Leste nian iha loron 25 fulan-novembru tinan 2021. Hafoin independénsia nia kontinua servisu ba nasaun nu’udar Deputadu ba Parlamentu Nasionál ne’ebé eleitu husi Partidu Demokrátiku iha lejislatura dalima nian.
Iha sesaun solene ne’e, kada Bankada Parlamentar sira mós hato’o mensajen de kondolénsia ba maktoban, hahu ho CNRT, PD, FRETILIN, KHUNTO no PLP.
Sesaun solene ne’ebé hahu ho exekusaun hino nasionál no minutu ida hakmatek, prezide husi Prezidente Parlamentu Nasionál, Maria Fernanda Lay, akompaña husi membru Meza sira.
loading="lazy" />