G—NEWS (DILI) — Parlamentu Nasionál liu husi sesaun plenária extraordinária, iha loron 7 fulan novembru tinan 2025, kontinua halo diskusaun no aprovasaun iha jeneralidade ba Proposta Lei n.o 23/VI (3a) – Orsamentu Jeral Estadu (OJE) 2026 ho lema “Investir na transformação nacional, na integração regional e no desenvolvimento Inclusivo”.
Loron ikus ba diskusaun iha jeneralidade ne’e hahu ho resposta husi Primeiru-Ministru, Kay Rala Xanana Gusmão, inklui Membru Governu sira, hanesan, Vice-Primeiru-Ministru, Ministru Koordenador ba Assuntus Ekonómikus no Ministru Turismu no Ambiente, Ministru Interior, Ministru Petróleu no Rekursus Minerais, Ministru Negosius Estranjeirus no Kooperasaun, Vice-Ministra Asuntu ASEAN, Ministru ba Assuntus Kombatentes Libertasaun Nasionál, ba preokupasaun sira ne’ebé aprezenta ona husi Deputadu sira iha debate loron da-ruak nian (6-novembru 2025).
Depois de resposta, Deputadu sira kontinua hato’o preokupasaun no hetan resposta imediata husi Governu. Liu husi prosesu diskusaun nebe naruk ne’e, hakotu ho intervensaun final husi kada Bankada Parlamentar inklui Intervensaun husi Primeiru-Ministru, hodi manifesta pozisaun opiniaun politika Bankada no Governu nian ba OJE 2026. Ikus Deputadu sira aprova OJE 2026 ho votus a favor 42, Kontra 0 no abstensaun 23.
Loron ikus diskusaun no aprovasaun iha jeneralidade ne’e termina iha horas 17h23 no sei kontinua diskusaun no aprovasaun iha especialidade ba OJE 2026, iha loron 10 fulan novembru tinan 2025.
Sesaun Plenária ne’ebé hahu ho exekusaun Hinu Nasionál, no Minutu ida hakmatek prezide husi Prezidente Parlamentu Nasionál, Maria Fernanda Lay, akompaña husi membru Mesa sira no hetan prezensa husi Primeiru-Ministru, Kay Rala Xanana Gusmão, no membru Governu sira, no mos entidade relevante sira.
loading="lazy" />