G-NEWS (DILI) – Durante loron rua, hahú Tersa-feira no Kuarta-Feira (15-16/08/2023) komisaun espesializada permanente sira hosi Parlamentu Nasionál (PN), halo ona audiénsia ba Orsamentu Retifikativu tinan 2023, ne’ebé aprezenta hosi Vise Ministru Asuntu Parlamentar Adérito Hugo da Costa, iha loron 10 fulan agustu foin lalais ne’e.
Proposta OR ne’ebé aprezenta ho montante biliaun 1.9 dolar amerikanu ne’e ho karater urjénsia tuir planu no nesesidade ne’ebé governu define.
Audiénsia ne’ebé prezide husi Prezidente Komisaun C Cedelizia Faria dos Santos ho partisipasaun Deputadu sira husi Komisaun espesializada Permanente sira, hahú ho Ministériu Finansas, BCTL, CCFP, RAEOA, Ministériu Solidariedade Sosiál.
Iha kontinuasaun audiénsia ba loron daruak nian, Komisaun Espesializada Permanente sira audiénsia ho Ministériu Finansas, Autoridade Tributária Aduaneira ho instituisaun sira ne’ebé sofre aliterasaun tuir Orsamentu Retifikativu refere.
Durante audiénsia, Deputadu sira ko’alia kona-ba kapasidade ezekusaun, sustentabilidade fiskál, kualidade orsamentál no efisiénsia efikásia orsamentál.
Alem de ne’e ko’alia mós kona-ba polítika no prioridade IX Governu iha fulan 4 nia laran ne’ebé presiza asegura ho orsamentu Orsamentu Retifikativu.
Iha Proposta Orsamentu Retifikativu ne’e, Governu aprezenta mós Proposta Lei ba alterasaun dahuluk Lei n. 15/2022, loron 21 fulan-dezembru, kona-ba Orsamentu Jerál Estadu ba tinan 2023 no Lei n. 2/2022, loron 10 fulan-fevereiru, kona-ba enkuadramentu ba Orsamentu Jerál Estadu no Jestaun Finanseira Públika no alterasaun daruak Lei n.8/2008, loron 30 fulan-juñu, Lei Tributária.
Jornalista : Ekipa G-News / Média PN
Editór Testu : Amito Qonusere Araújo
loading="lazy" />