G-NEWS (DILI) — Ekipa Konjunta kompostu hosi Komandu Polísia Nasional Timor-Leste (PNTL) liuhosi Departamentu Investigasaun Kriminal Nasional (DIKN), Servisu Nasional Inteligensia (SNI), Servisu Informasaun Polísia (SIP) no Alfândega, iha segunda-feira, loron 22 fulan-Jullu tinan 2024, identifika Sigaru Elézitu ne’ebé tama iha Portu Tibar, la hetan autorizasaun hosi Ministériu Saúde.
Liuhosi konferénsia Imprensa, kuarta-feira (24072024) iha Komandu-Jerál PNTL Kaikoli, Dili, Xefe Departamentu Investigasaun Kriminal Nasional, Superintendente Polísia João Belo dos Reis esplika, hafoin autoridade seguransa identifika kompaña ne’ebé hatama Sigaru refere, tenta bosok autoridade Portu, hodi manifesta lista aprezentasaun katak, sasan ne’ebe sira hatama iha kontainer laos sigaru, maibé Supermie (Indomie).
Hosi ne’e, ekipa konjunta autoridade seguransa halo operasaun, no konsege prende kareta ida ne’ebé tula sai sigaru, no asegura ona iha Kuartél-Jerál PNTL hodi prosesa tuir lei.
“Hodi nune’e ekipa konjunta halo operasaun konsege prende kareta Tronton ida ne’ebé tula hela Sigaru sira ne’e lori mai hela iha Kuartél-Jerál PNTL no identifika katak, iha kareta laran ne’e iha deit Sigaru Karton 272”.
“No seluk ekipa Konjunta sei buka tuir nafatin, relasaun ba kazu ida ne’e, DIKN aprezenta ona ba Ministériu Públiku (MP)”, Superintendente Polísia João Belo dos Reis esplika.
Komandu-Jerál PNTL mós husu ba públiku atu labele sosa sigaru ho marka Manchester United Kingdom, no kuandu hetan halo sirkulasaun iha loja sira, bele aprezenta keixa ba autoridade seguransa hodi halo atuasaun.
“Uza oportunidade ida ne’e, hakarak públika ba maluk sira, Sigaru ho marka Manchester United Kingdom, nia iha masu mean no mutin. Ba maluk balun, karik ema ruma faan ka ema ruma lori hodi halo sirkulasaun iha ita bo’ot sira nia kios, husu atu labele hola no aprezenta ba Polísia atu bele halo atuasaun”.
Kontinua “Tanba sigaru ne’e rasik Ministériu Saúde la autoriza tama, no nia la kumpri rekezitus sira ne’ebe ita nia governu estabelese iha Portu Dili”.
Tuir Superintendente Polísia João Belo dos Reis katak, to’o oras ne’e autoridade seguransa seidauk halo notifikasaun ba na’in sigaru ho marka Manchester United Kingdom, tanba nia na’in sei iha hela rai-liur.
“Na’in ba kompaña refere sei iha hela estrangeiru, tanba ne’e ami seidauk notifikasaun nia, karik nia fila mai maka ami sei halo notifikasaun hodi bele aprezenta ba Tribunal”.
Autoridade seguransa sei halo operasaun tama sai loja hodi buka tuir sidadaun sira ne’ebé faan, no halo sirkulasaun iha merkadu, nune’e bele prosesa.
Editór Testu : Amito Qonusere Araújo
loading="lazy" />