G—NEWS (DILI) — Komandu Polísia munisípiu Dili kaptura ona mane ida ne’ebé deskonfia halo tentativa asédiu seksuál hasoru ema estranjeiru iha área Merkadu Tais, Colmera, iha Domingu, 6 Jullu 2025 maizumenus tuku 11 dadeer.
Insidente ne’e akontese iha merkadu ne’ebé nakonu ho ema, no atrai rezidente lokál sira ne’ebé relata kedas autoridade sira.
Portavós Komandu-Jerál PNTL Superintendente Polísia João Belo dos Reis, konfirma katak suspeitu ne’e kaptura kedas iha fatin akontesimentu.
“Tanba ne’e orseik suspeitu ita kaptura kedas no lori mai Komandu PNTL Munisipiu Dili hodi halo identifikasaun, ita konsidera ne’e krime tanba tenta atu halo asediu seksual iha fatin públiku”, haktuir Porta Voz Komandu PNTL Superintendente Polísia João Belo dos Reis.
Daudaun ne’e, polísia kontinua hala’o prosesu investigasaun hodi esplora autór nia motivu, nune’e mós fó protesaun ba vítima.
Kazu ne’e sai hanesan lembransa kona-ba importánsia husi vijilánsia iha espasu públiku no nesesidade ba sistema seguransa ida ne’ebé responde ba aktu asédiu, liuliu hasoru grupu vulneravel sira hanesan ema estranjeiru no feto sira.
loading="lazy" />