G—NEWS (DILI) — Xefe Estadu José Ramos-Horta, nomeia Eis Juiz administradór Tribunál Dili, juiz Afonco Carmona, nu’udar Prezidente Tribunal Rekursu, hodi troka Deolindo dos Santo.
Nomeiasaun ne’e, bazeia ba dekretru Prezidente Repúblika nian, ho númeru 35/2025, ne’ebé asina ona husi Prezidente Repúblika José Ramos-Horta, no públika ona iha Jornál da Repúblika, iha loron 29 fulan-Abríl tinan 2025.
Konteudu iha dekretu Prezidente Repúblika ne’e haktuir katak, Konstituisaun Repúblika Demokrátika Timór Lorosa’e mós estabelese, iha termu númeru 2 hosi artigu 164, katak Tribunál Rekursu, nu’udar “Tribunál aas liu ba organizasaun judisiál” ne’ebé eziste iha Timór Lorosa’e, ezerse podér sira Supremu Tribunál Justisa nian, to’o ninia instalasaun no tama iha funsionamentu.
Nune’e, Prezidente Repúblika, tuir artigu 86.º, j) artigu 124.º, no. 3 no artigu 164 no. 2 Konstituisaun Repúblika nian, no tuir termu lejizlasaun ne’ebé vigora, dekretu:
- Sr. Dr. Afonco Carmona hetan nomeasaun nu’udar Prezidente Tribunál Rekursu.
- Dekretu ida-ne’e sei iha efeitu bainhira publika.
Konstituisaun Repúblika Demokrátika Timór Lorosa’e, tuir termu sira Artigu 86, alínea j), hamutuk ho Artigu 124, alínea 3, fó kbiit ba Prezidente Repúblika atu nomeia, hosi nia juís sira nia leet, Prezidente Supremu Tribunál Justisa nian.
Turi ajenda, Xefe Estadu sei fó pose ba Prezidente Tribunal Rekursu foun, iha Palásiu Prezidensial Nicolau Lobato, Dili, tersa-feira (29042025) lorokraik.
loading="lazy" />