G-NEWS (MAUBISSE) — Prezidente Repúblika (PR) José Ramos Horta, ko’alia sai ona Papa Francisco nia mensajen, bainhira remata ninia vizita Apostóliku durante loron-tolu, iha Aeroportu Internasionál Prezidente Nicolau Lobato Comoro Dili.
Prezidente Repúblika dehan, antes Papa Francisco sae aviaun, atu kontinua hala’o nia viajen Apostólika ba Singapura, dada nia liman hodi bisu-bisu ba nia tilun.
Papa Francisco ko’alia Prezidente Repúblika José Ramos Horta atu tau matan di’ak ba povu Timor Leste.
“Imi tau matan di’ak ba povu di’ak ida ne’e”, Prezidente Repúblika ko’alia tuir mensajen Papa Francisco nian, iha enseramentu Festival Rabilau 2024 iha Maubisse, munisípiu Ainaro, sesta-feira kalan (18102024).
Iha Festival Rabilau tinan 2024, Prezidente Repúblika agradese ba governu dasia, Konferénsia Episkopal Timorense (CET_sigla Portugés), autoridade Relijiozu no entidades hotu, tanba organiza no halo prepasaun di’ak hodi simu vizita Papa Francisco durante loron tolu iha Timor Leste, ne’ebé la’o ho di’ak no susesu.
Santu Padre Francisco dala barak ko’alia kona-ba importánsia domin no kompaixaun nian iha ita-nia moris. Nia konvida ema hotu atu hadomi malu inkondisionalmente, subliña katak domin mak forsa ida ne’ebé bele muda mundu.
Iha ninia mensajen sira, nia mós destaka importánsia perdaun nian, hodi fó hanoin mai ita katak perdua ema seluk maka xave atu hetan dame iha laran.
Papa Francisco konvida umanidade atu moris simples, apresia buat ki’ik sira, no labele monu ba sasán materiál sira. Aleinde ida-ne’e, nia sempre fó hanoin mai ita kona-ba ita-nia responsabilidade hasoru ambiente, hodi bolu nesesidade atu tau matan no proteje Maromak nia kriasaun atu nune’e jerasaun sira iha futuru bele goza.
Liu husi ninia liafuan, Santo Padre konvida ita atu moris iha armónia, suporta malu, kontribui positivamente ba sosiedade. Ninia mensajen sira kona-ba domin no esperansa sai inspirasaun ba ema barak iha mundu tomak.
Editór Testu : Amito Qonusere Araújo
loading="lazy" />