G—NEWS (DILI) — Prezidénsia Repúblika ohin, loron 29 fulan-juñu, realiza workshop ida iha Palásiu Prezidensiál Nicolau Lobato ho tema “Haforsa Profisionalizmu no Étika iha Servisu Públiku”. Dirije ba funsionáriu sira husi instituisaun ne’e, eventu ne’e iha objetivu prinsipál atu promove eselénsia, integridade, no responsabilidade iha ezersísiu funsaun públika nian, hodi garante servisu ne’ebé efisiente liu, transparente, no dedikadu ba Estadu no ba sidadaun timoroan hotu.
Enkontru ne’e konta ho painél husi oradór sira ne’ebé eselente. Jenerál reformadu Lere Anan Timur destaka importánsia atu sai “sidadaun ne’ebé di’ak no servidór públiku ne’ebé di’ak” iha kontestu dezenvolvimentu nasionál, hodi apela ba disiplina ne’ebé rigorozu, pontualidade no servisu ekipa ne’ebé saudavel.
Iha sorin seluk, Prezidente Komisaun Funsaun Públika (KFP), Agostinho Letêncio de Deus, foka ninia intervensaun ba ekilíbriu ne’ebé labele haketak entre direitu no devér sira, hodi fó-hanoin katak, iha servisu públiku, dala barak ema hahú hodi ezije uluk “Direitu” maibé haluha tiha “Devér”. Hodi fó ezemplu husi veteranu sira Timor-Leste nian, ne’ebé uluk halo funu la simu saláriu ka rekompensa ruma, Prezidente KFP dezafia partisipante sira atu reflete karik espíritu dedikasaun ba rai ida-ne’e sei eziste nafatin ohin loron.
Nia subliña mós obrigasaun ne’ebé labele negoseia atu kumpre devér esensiál sira hanesan: lealdade, obediénsia, zelu, sijilu profisionál, izensaun (imparsialidade), asiduidade no pontualidade.
Nune’e mós, Me. Guilhermina Marçal ko’alia kle’an kona-ba papél étika, konxiénsia morál no integridade ba servidór públiku sira. Oradora ne’e halo alerta maka’as hasoru “Vandalizmu Morál” iha instituisaun sira-nia laran, atitude no hahalok sira ne’ebé estraga ambiente servisu nian no mós servisu ne’ebé hala’o. Me. Guilhermina destaka katak, aas liu regra hakerek hotu, “lei fundamentál mak konxiénsia” husi ema idaidak, hodi apela atu funsionáriu sira Prezidénsia nian sai ezemplu aas liu husi hahalok ne’ebé loos no transparente ba nasaun.
Ho inisiativa institusionál ne’e, Prezidénsia Repúblika reafirma ninia kompromisu metin atu valoriza ninia rekursu umanu sira no kombate ativamente kualkér desviu étiku. Instituisaun fiar katak atu hametin loloos Estadu ezije servidór sira ne’ebé la’ós de’it iha kompeténsia téknika, maibé mós iha pilár prinsípiu morál ne’ebé metin hodi serbí povu Timor-Leste.
Media PR
loading="lazy" />