G—NEWS (DILI) — Prezidente Repúblika Demokrátika Timor Leste, José Ramos-Horta, konvida pesoalmente Megawati Soekarnoputri, Prezidente Repúblika Indonézia ba dala 5 no Prezidente Partidu PDI-P, hodi vizita Timor Leste.
Ramos Horta hato’o konvite ne’e durante enkontru ho Megawati iha Abu Dhabi Emiradus Árabes Unidus (EAU). Informasaun ne’e hato’o hosi Ahmad Basarah, Xefe Konsellu Ezekutivu Sentrál PDI-P nian ba Negósiu Estranjeiru, iha deklarasaun eskrita ida iha loron-kuarta (4 fulan-Fevereiru tinan 2026).
“Prezidente Ramos Horta konvida Sra. Megawati mai vizita Timor Leste. Konvite ne’e hato’o direitamente durante enkontru ida ne’ebé manas,” dehan Basarah.
Basarah esplika katak, enkontru ne’e hala’o iha Megawati nia hela-fatin iha Abu Dhabi, lakleur hafoin Megawati hasoru malu ho Prínsipe Erdeiru Abu Dhabi nian, Xei Khaled Bin Mohamed Bin Zayed Al Nahyan.
Antes ne’e, Megawati no Ramos-Horta mós hasoru malu iha fórum internasionál Human Fraternity Majlis ne’ebé hala’o iha Muzeu Nasionál Zayed, iha Abu Dhabi, Tersa (loron 3 fulsn-Fevereiru). Sira na’in rua marka prezensa nu’udar oradór iha fórum, ne’ebé diskute kestaun kona-ba dame no maun-alin globál.
Tuir Basarah, enkontru entre Megawati no Prezidente Ramos-Horta—ne’ebé manán mós Prémiu Nobel ba Pás 1996—hala’o iha atmosfera kordiál no familiár.
“Sra. Megawati simu ho laran-kdolok Prezidente Ramos nia vizita antes serimónia Prémiu Zayed 2026. Enkontru ne’e kordiál hanesan figura nasionál sira hosi nasaun viziñu,” Basarah hatete.
Durante konversa, líder na’in rua ne’e ko’alia kona-ba asuntu estratéjiku oioin, liuliu kona-ba dezafiu hodi mantein pás mundiál no importánsia hosi valór maun-alin entre nasaun.
“Diskusaun prinsipál kona-ba dezafiu ba dame globál no oinsá maka valór irmandade nian tenke kontinua mantein iha dinámika globál nia leet”, Basarah kontinua.
Megawati mós hato’o kona-ba istória pesoál ida ne’ebé relasiona ho nia oan adotivu, ne’ebé oras ne’e daudaun hala’o kna’ar nu’udar Embaixadór Timor-Leste nian iha Kamboja.
“Sra. Megawati ko’alia kona-ba nia oan adotivu, Kupa Lopez, ne’ebé agora daudaun hanesan embaixadór Timor-Leste nian iha Kamboja,” Basarah hatete.
Hafoin hasoru malu ho Ramos-Horta, Megawati kontinua ajenda ba kulminasaun serimónia Prémiu Zayed 2026 nian. Serimónia prinsipál hala’o iha Memoriál Fundadór nian, enkuantu jantar hala’o iha Palásiu Emirates, Abu Dhabi.
Ba ita-boot nia informasaun, Prémiu Zayed 2026 nian fó ba figura no organizasaun globál oioin, inklui sira ne’ebé envolve iha akordu dame istóriku entre Azerbaijaun no Arménia, ativista edukasaun feto Afganistaun nian Zarqa Yaftali, no organizasaun umanitária Palestina Taawon.
Fontes: Arahkita.com
loading="lazy" />