G-NEWS (DILI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias hala’o dialógu ho komunidade Beto-Timur ne’ebé hela besik área risku hanesan mota- ibun Comoro no bronjong leten iha suku Madohi.
Ohin prezensa ekipa konjunta hosi liña Ministerial ho objetivu atu desemina informasaun hosi programa governu nian kona-ba asuntu alargamentu estrada iha Suku Madohi, Postu Administrativu Dom Aleixu, Munisípiu Díli.
Iha tempu badak ekipa hosi Ministeriu Obras Públikas liu hosi Diresaun Edivikasaun sei mai halo levantamentu dadus no tau markasaun ba uma, husu komunidade sira atu koopera hodi prepara dokumentus. Governu sei fó komunidade sira nia direitu indiminizasaun ba sasan no ai-horis sira.
Antes iha Semana hirak liu-ba, fulan janeiru ne’e. ita halo ona despezu administrativu iha mota sorin parte fomentu II, Fomentu I no Bebonuk. Ohin ekipa hahú halo dialógu ho komunidade suku Madohi, Mota-ain ba ponte CPLP, depois sei kontinua to’o Kasnafar.
Tuir dezeñu ba alargamentu estrada ne’e, sei hahú hosi Mota-ain Beto Timur ba ponte CPLP, Ponte Ill to’o Kasnafar.
Iha Dialógu ne’e akompaña hosi Ministeriu Obras Publikas (MOP) liu hosi Tekniku Resenseamentu ba Indiminizasaun, Diretor Nasional Terras e Propiedades, Sr. Gaspar Soares de Sá Benevides. Diretor Nasional Higinie e Orden Públika (DNHOP), Sr. Egas Jóse Caetano. Polisia Nasional Timor Leste (PNTL) liu hosi Komandante Esquadra Dom Aleixo, Administrador Postu Administrativu Dom Aleixo no Autoridade Lokal inklui mós komunidade afetadu iha Suku Madohi.
Fontes: Relasaun Públika SEATOU