G-NEWS (DILI) – Sekretaria Estadu Komunikasaun Sosiál (SECOMS) despede delegasaun Asosiasaun Jornalista Timor Lorosa’e (AJTL) no União Profissional Jornalista Timor-Leste (UPJTL) ne’ebé sei halo media tour no kobertura jornalístika iha Bobonaro, no Região Administrativa Especial Oe-Cusse Ambeno (RAEOA).
Iha okaziaun despedida ne’e, Expedito Loro Diaz hato’o agradesimentu ba Prezidente AJTL, Prezidente UPJTL no membru sira hotu ne’ebé partisipa iha atividade media tour ne’e.
Nia subliña katak jornalista sira la’ós deit servisu iha meza redasaun, maibé presiza mos sai ba komunidade atu haree no komprende diretamente realidade no moris povu, liuliu iha área rural no izolada.
“Jornalista la’ós deit tenke hela iha meza redasaun. Ita presiza mos ba komunidade atu konhese moris real povu nian,” dehan Expedito Iha palasiu Governu Kuarta-Feira nee (30/09/2026)
Nia hatete katak média iha papel importante hanesan ponti entre komunidade, públiku no instituisaun relevante, liuliu atu lori informasaun kona-ba realidade no nesesidade komunidade iha área rural.
Expedito mos enfatiza katak apoiu husi governu ba atividade jornalístika tenke respeita independénsia editorial no labele interfere ba polítika editorial redasaun. Nia subliña importánsia liberdade imprensa, independénsia editorial no responsabilidade profissional jornalista sira nian.
Nia mos hato’o atensaun kona-ba avansu teknolojia, liuliu Inteligénsia Artifisial (AI), ne’ebé iha benefísiu maibé mos iha risku ba jornalista no utilizadór média sosial. Tanba ne’e, nia husu atu uza teknolojia dijitál no AI ho responsabilidade no tuir prinsipiu ética jornalístika.
AJTL Fó Atensaun ba Realidade Komunidade
Prezidente AJTL, Zevonia Vieira, hatete katak atividade media tour ne’e hala’o nu’udar parte husi programa AJTL atu lori jornalista sira ba área rural, fronteira no komunidade izolada.
Nia hatete katak komunidade iha área fronteira no izolada sei hasoru dezafiu iha edukasaun, saúde no asesu ba informasaun. Tanba ne’e, jornalista sira iha papel importante atu kobre realidade sira ne’e no fó sai ba públiku.
“Jornalista kontribui liu husi kobertura informasaun, no governu mos bele haree no buka solusaun ba problema sira ne’ebé komunidade hasoru,” hatete Zevonia.
AJTL sei hala’o atividade iha rua komponente prinsipál, mak media tour ba área fronteira no komunidade izolada, no sosializasaun kona-ba literasia dijitál ba juventude no estudante sira, ho énfaze ba utilizasaun informasaun dijitál ho responsabilidade no kombate misinformasaun.
UPJTL: Hakbesik Jornalista ba Komunidade
Prezidente UPJTL, Horácio Babo, hatete katak objetivu prinsipál husi media tour mak atu hakbesik jornalista sira ba komunidade, liuliu iha munisípiu no área fronteira.
“Jornalista sira sei desloka ba munisípiu sira, liuliu área fronteira, atu halo vizita no sosializasaun kona-ba literasia média ba foinsa’e no komunidade sira,” hatete Horácio Babo.
Nia hatete katak atividade ne’e la’ós deit atu halo kobertura kona-ba realidade komunidade, maibé mos atu kobre atividade sosial sira iha área rural nu’udar parte husi preparasaun ba komemorasaun Loron Liberdade Imprensa, ne’ebé sei komemora iha 16 Outubru.
UPJTL sei aproveita oportunidade ne’e atu realiza media tour ba RAEOA durante loron ha’at. Iha Oe-Cusse, jornalista sira sei vizita área rural, hasoru estudante no komunidade, no sosializa importánsia média ba foinsa’e sira.
Horácio espera katak atividade ne’e bele ajuda jornalista sira komprende di’ak liután situasaun komunidade, haree prosesu dezenvolvimentu no dezafiu sira, no lori realidade komunidade ba públiku liuhusi kobertura jornalístika.
Atividade media tour ne’e mos sai hanesan oportunidade atu hametin relasaun entre jornalista sira no komunidade, no asegura katak realidade husi área rural no fronteira bele hetan atensaun liu husi média independente no responsabilidade
loading="lazy" />